بەپێی هەواڵی کوردپرێس، سه‌لاحه‌دین به‌هائه‌دین ئه‌مینداری گشتیی یه‌کگرتووی ئیسلامی له په‌یامێکدا له هه‌ژماری تایبه‌تی خۆی له تۆڕی کۆمه‌ڵایه‌تی فه‌یسبووک نووسیویه‌تی: "20ی مانگه و 50 ڕۆژه مووچه نه‌دراوه، ئه‌م تاوانه به‌ویژدانی کێ ڕه‌وایه؟ هۆکار هه‌رچی بێت و پاساو هه‌رچی بێ؟ فه‌رمانبه‌ری هه‌رێم و مناڵه بێنازه‌کانی باجه‌که‌ی ئه‌ده‌ن، ده‌ستی ده‌ستیکردن به‌قوتی هاوڵاتیان له فه‌رهه‌نگی چ مرۆڤێکی ویژدان زیندودا جێی ئه‌بێته‌وه؟".
ناوبراو ڕاشیگه‌یاندووه: "دادگای باڵای فیدڕاڵی بڕیاری خۆی داوه و هه‌ردو حکومه‌تی مولزه‌م کردوه به پێدانیی موچه‌ی موچه‌خۆران له‌کاتی خۆیدا، به فه‌رمانبه‌ر و خانه‌نشین و هێزه‌ئه‌منیه‌کانه‌وه، ئێمه وه‌کو هه‌ست به به‌رپرسیاریه‌تی نیشتمانی، وه‌کو ئه‌وه‌ی برایانمان شه‌ره‌فی ساغکردنه‌وه و ده‌رچواندنی ئه‌و بڕیاره مێژوییه‌مان به‌رکه‌وت، جه‌ختئه‌که‌ینه‌وه له ڕاگرتنی ئه‌م یارییه ناشیرینه".
سه‌لاحه‌دین به‌هائه‌دین ده‌شڵێت: "ده‌بێت هه‌ردوو حکوومه‌ت به‌رپرسیارانه کارئاسانی بکه‌ن بۆ جێبه‌جێ کردنی بڕیاره‌که‌ی دادگا، نه‌ک خۆبدزنه‌وه و کۆسپی بۆ دروست بکه‌ن، شه‌ڕی سیاسی و هه‌ڵبه‌زودابه‌زی بواره‌کانی تر له‌سه‌ر حسابی قووتی هاوڵاتی ساغ بکه‌نه‌وه، به‌پێچه‌وانه‌وه ئێمه ناچارین سکاڵا له‌سه‌ر سه‌رپێچیکار تۆمار بکه‌ینه‌وه".
Your Comment