بەپێی هەواڵی کوردپرێس، فراکسیۆنی یەکێتیی نیشتمانیی کوردستان لە پەرلەمانی عێراق لە ڕاگەیێندراوێکدا باس لە ئۆپەراسیۆنی ئەم چەند ڕۆژەی سوپای تورکیا لە خاکی هەرێمی کوردستان دەکات و دەڵێت: "بەداخەوە لەئەنجامی بەردەوامیی ئۆپەراسیۆنەکە، زەرەر و زیانی زۆر بە رەز و باخی هاووڵاتییانی ناوچەکە گەیشتووە و ئەو دۆخە بووەتە مایەی بێزارکردنی خەڵک".

هەروەها دەڵێت: "ئێمە وەک فراکسیۆنی یەکێتیی نیشتمانیی کوردستان لە ئەنجوومەنی نوێنەرانی عێراق، نیگەرانیی قووڵی خۆمان دەردەبڕین. ئەم پێشێلکارییانە بۆ سەر خاکی هەرێمی کوردستان و سەروەریی عێراق شەرمەزار دەکەین. چونکە پاراستنی ئاسایشی وڵات و سەلامەتیی هاووڵاتیان دەخاتە ژێر مەترسییەوە. هاوکات پێشێل کردنی یاسا نێودەوڵەتییەکانە".

فراکسیۆنی یەکێتی داوا لە هەردوو حکومەتی عێراق و هەرێمی کوردستان دەکات، بە شێوەیەکی هاوئاهەنگ رێگری لەو ئۆپەراسیۆنانەی تورکیا بکەن و دەڵێت "بێدەنگیی حکومەتی عێراق و حکومەتی هەرێم لەهەمبەر ئۆپەراسیۆنێکی وەها گەورەی تورکیا لەسەر خاکی هەرێمی کوردستان، رەنگدانەوەی لەسەر متمانەی عێراق و هەرێمی کوردستان لەنێو کۆمەڵگەی نێودەوڵەتی و هاووڵاتییانی دەبێت".

لە راگەیێندراوەکەدا، هۆکاری بەردەوامیی ئۆپەراسیۆنەکانی تورکیا بۆ ئەوە گەڕێندراوەتەوە؛ 'تائێستا عێراق نەیتوانیوە خۆی بەهێز بکات و وەڵامی ئەم جۆرە پێشێلکاریانە بداتەوە".

فراکسیۆنی یەکێتی هەروەها داوا لە حکوومەتی عێراق دەکات، کەسوکاری شەهیدان و هاونیشتمانییانی زیانبەرکەوتووی ئەو ئۆپەراسیۆنانە قەرەبوو بکرێنەوە.

سەرچاوە: تۆڕی میدیایی ڕووداو