بەپێی هەواڵی کوردپرێس، وەزارەتی بەرگریی تورکیا بڵاوی کردەوە ڕۆژی 22ی 5ی 2024  ڤەدات زۆربا، سەربازی پیادەی گرێبەست لە ناوچەی ئۆپەراسیۆنی چنگ-قوفڵ لە هەرێمی کوردستان بۆمبێکی چێندراوی پێدا تەقیوەتەوە کە پێشتر لەلایەن PKKوە دانراوە و بەو هۆیەوە بە سەختی بریندار بووە. دوای ئەوەی گوازراوەتەوە بۆ نەخۆشخانە، گیانی لەدەستداوە.

لەلایەکی دیکەوە ناوەندی ڕاگەیاندنی هێزەکانی پاراستنی گەل-هەپەگە کە باڵی سەربازیی پەکەکەیە، لە دوایین ڕاگەیێندراویدا کە دوێنێ چوارشەممە بڵاویکردووەتەوە، دەڵێت، سوپای تورکیا لە رۆژی 20 بۆ 21ـی ئایار لە هێرشەکانیدا بۆ سەر PKK لە ناوچەکانی زاپ، مەتین و خواکورک 32 جار چەکی کیمیایی و قەدەخەکراوی بەکارهێناوە و فڕۆکەی جەنگی و تۆپخانەکانیان بە شێوەیەکی بەردەوام بۆردوومان و تۆپبارانی ئەو ناوچانەیان کردووە.

ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد و تائێستا بەردەوامە.