بەپێی هەواڵی کوردپرێس، به‌ره‌ی گه‌ل که لاهوور شێخ جه‌نگی سه‌رۆکایه‌تیی ده‌کات له ڕاگه‌یه‌ندراوێکدا سه‌باره‌ت به دیاری نه‌کردنی واده‌ی نوێ بۆ ئه‌نجامدانی هه‌ڵبژاردنه‌کانی په‌رله‌مانی کوردستان ڕایدەگەیەنێت: "وه‌ک هه‌موو لایه‌ک ئاگادارن، سه‌رۆکی هه‌رێمی ماوه‌به‌سه‌رچوو یه‌که‌م مه‌رسومی بۆ ئه‌نجامدانی هه‌ڵبژاردنی په‌رله‌مانی کوردستان له ۲۴ی (نیسان/۴) ساڵی ۲۰۲۲ ده‌رکرد که تیایدا ڕۆژی ۱ی ئۆکتۆبه‌ری هه‌مان ساڵی بۆ ئه‌نجامدانی هه‌ڵبژاردن دیاری کردبوو، له‌و کاته‌وه که زیاتر له دوو ساڵ تێده‌په‌رێت تا ئێستا سێ جاریتر کات و ڕۆژی هه‌ڵبژاردنی دیاریی کردووه و هیچیان جێبه‌جێ نه‌کراون، که دواجاریان ۱۰ی (حوزه‌یران/۶)ی ئه‌مساڵ بوو، ئه‌وه‌بوو پاش شه‌ڕێکی میدیایی پڕ سیناریۆ و شیعاربازی نێوانیان به ڕێکه‌وتنی حزبی پێشوه‌خته پارتی و یه‌کێتی ئه‌ویشیان دواخست، سه‌رۆکی هه‌رێمیش له‌و هه‌موو دواخستن و په‌کخستانانه‌دا بۆ ته‌نها جارێکیش و به دیڕێک ڕوونکردنه‌وه‌ی نه‌دایه خه‌ڵکی کوردستان و هاونیشتیمانیان که ئاخۆ هۆکاری ئه‌و دواخستنانه چییه و بۆچی ئه‌و وادانه‌ی ئه‌و دیاریان ده‌کات له‌بری پابه‌ندبوون پێیانه‌وه به سووکایه‌تی کردنه‌وه دواده‌خرێن؟! به مه‌رجێک کۆمسیۆن که لایه‌نی جێبه‌جێکاری هه‌ڵبژاردنه سه‌رجه‌م پێداویستییه‌کانی له هه‌موو ڕویه‌که‌وه ئاماده‌کردبوو".
بەرەی گەڵ ڕاشیگەیاندووە: "ئه‌و خه‌مساردیه‌ی سه‌رۆکی هه‌رێم، پرسیاری گه‌وره له‌سه‌ر ڕۆڵ و ئه‌رکی دامه‌زراوه‌ی سه‌رۆکایه‌تی هه‌رێم دروست ده‌کات، به‌وه‌ی ئایا ڕۆڵی ئه‌و دامه‌زراوه‌یه له سه‌روه‌ختی سه‌رۆکایه‌تی نێچیرڤان بارزانیدا ته‌نها بووه به ده‌رکردنی مه‌رسووم بێ ئه‌وه‌ی پارتی و یه‌کێتی ڕێزی بگرن؟! یاخود سه‌رۆکی ئه‌و دامه‌زراوه گرنگه خۆی ئه‌و حاڵه‌ته‌ی قبووڵه و به‌شێکه له پرۆسه‌ی بێ‌بایه‌خ کردنه‌که به‌تایبه‌تی که هه‌ر له‌سه‌ره‌تاوه بێ‌ده‌نگ و بێ‌هه‌ڵوێست بوو له درێژکردنه‌وه‌ی ته‌مه‌نی نایاسایی په‌رله‌مان و سه‌رچاوه‌ی هه‌موو کیشه‌کانی هه‌ڵبژاردنیش له‌و درێژکردنه‌وه نایاساییه‌وه سه‌رچاوه‌یان گرت".
به‌ره‌ی گه‌ل ده‌شڵێت: "ئێمه به ڕوونی ڕایده‌گه‌یه‌نین ئه‌گه‌ر سه‌رۆکی هه‌رێم، توانای ئه‌وه‌ی نییه واده‌یه‌کی نوێ بۆ هه‌ڵبژاردن دیاری بکات و پێی وایه حزبه‌که‌ی خۆی و هاوپه‌یمانه‌که‌ی که یه‌کێتیه ڕیزی بریاره‌کانی ناگرن، پێویسته داوا له کۆمسیۆن بکرێت واده‌یه‌کی نوێی کۆنکرێتی بۆ ڕۆژی هه‌ڵبژاردن دیاری بکات و ئه‌و به‌رپرسیارێتیه بسپێردرێ به ئه‌وان".
بەرەی گەل ئاماژه‌ی به‌وه‌ش کردووه، "خۆدزینه‌وه‌ی زیاتری ده‌سه‌ڵات له هه‌ڵبژاردن و حساب نه‌کردن بۆ ئیراده‌ی خه‌ڵکی کوردستان و زه‌وتکرنی مافی ده‌نگدان، گورزی کاریگه‌رن له دیموکراسی و زیانی گه‌وره‌ن به‌رامبه‌ر پێگه و سه‌نگی ئه‌م هه‌رێمه له عێراق و ناوچه‌که‌دا، بۆیه ده‌بێت له نزیکترین کاتدا واده‌ی هه‌ڵبژاردنی په‌رله‌مانی کوردستان دیاری بکرێت".
Your Comment