بەپێی هەواڵی کوردپرێس، دواى ڕاگه‌یاندنى واده‌ى به‌ڕێوه‌چوونى هه‌ڵبژاردنى خولى شه‌شه‌مى په‌رله‌مانى كوردستان له‌لایه‌ن سه‌رۆكى هه‌رێمه‌وه‌، شاسوار عەبدولواحید سەرۆکی جووڵانەوەی نەوەی نوێ له ‌په‌یامێكدا هه‌ڵوێستى خۆى ڕاگه‌یاند و دەڵێت: "هەرچەندە ئەو ڕۆژەی دیاری کراوە بۆ ئەنجامدانی هەڵبژاردن لە هەرێمی کوردستان، بەڕای ئێمە دوورە و پێمان باش بوو زووتر هەڵبژاردنی پەرلەمانی کوردستان ئەنجام بدرایە".

سەرۆکی جووڵانەوەی نەوەی نوێ وتیشی، "بەڵام ئەنجامدانی هەڵبژاردن زۆر گرنگە بۆ خەڵکی کوردستان ‌و ڕزگاربوونیان لەم دۆخە ناهەموارە، بۆیە بەڕۆحێکی پڕهیوا و دڵێکی خۆشەوە چاوەروانی ڕۆژی هەڵبژاردن‌ و کۆتایی هێنانی ئەم حوکمڕانیە خراپەی پارتی ‌و یەکێتی دەکەین".

شاسوار عەبدولواحید له ‌په‌یامه‌كه‌یدا نووسیویه‌تى: "ڕۆژی ۲۰ى ئۆکتۆبەر ڕۆژێکی ناخۆشە بۆ دەسەڵاتداران ‌و ڕۆژی ڕووخانی ئەزموونی ۳۳ ساڵەی حکومڕانی بنەماڵەییە لە هەرێمی کوردستان‌ و ڕۆژی هاتنی دڵخۆشی ‌و خۆشگوزەرانییە بۆ خەڵکی کوردستان".