بەپێی هەواڵی کوردپرێس، لەمبارەوە وەزارەتی ناوخۆی هەرێمی کوردستان زیاتر ڕایگەیاندووە: چاوەڕوان دەکەن لایەنە پەیوەندیدارەکانی حکوومەتی فیدراڵ لەکاتی بوونی هێرش یان هەڕەشە لەسەر هەرێمی کوردستان یان ناوچەکانی دیکەی عێراق، ڕێوشوێنی پێویست بگیرێتە بەر، بەڵام "هەست دەکەین جۆرێک لە پەردەپۆشکردن و خۆدزینەوە لە بەرپرسیارێتیی هەیە".
لە ڕوونکردنەوەکەی وەزارەتی ناوخۆدا ئەوەش هاتووە، لە ساڵانی ڕابردوو لە کاتی هێرشەکان بۆ سەر هەرێمی کوردستان، هەرچەندە "ئاراستە و سەرچاوەی مووشەک و درۆنەکانیش دیاربوون و چەندین جار بۆ دەرخستنی راستییەکان لیژنەی هاوبەشی نێوان حکومەتی هەرێم و حکومەتی فیدراڵ دروست بوون، بەڵام دیسان بەداخەوە نە دەرئەنجامی لێکۆلینەوەکان بۆ رای گشتی ئاشکرا دەکران و نە لەسەر ئەو تاوانە ئاشکرا و کردەوە نایاساییانە کەس سزا دەدرا و هیچ رێوشوێنێکیش لەبەرانبەر هیچ لایەنێک نەگیرایەبەر".
وەزارەتی ناوخۆی هەرێم بە گەڕانەوە بۆ پەیوەندیی ئەو کات دەڵێت، ئەو کات "بەرزترین ئاستی نێوان هەردوولا هەماهەنگی هەبووە و بەڵگەی روون و ئاشکراش لەبەر دەست بوونە".
هەر بەگوێرەی وەزارەتی ناوخۆی هەرێمی کوردستان: "کەشوهەوای سیاسی و بیروڕای سیاسیی لایەنەکان بەهەر بارێکدا بێت، پاراستنی ئاسایشی وڵات و رێگەگرتن لە بە ئامانجگرتنی ژیانی هاووڵاتییان و سەروەری و سەقامگیریی وڵات ئەرکی لەپێشینەی دامودەزگە فەرمییەکانی هەردوو حکوومەتی فیدراڵی عێراق و حکوومەتی هەرێمی کوردستانە".
Your Comment