فەرامەرز ئەسەدی ئاماژەی دا بە هەوڵە بەردەوامەکان بۆ بەڕێوەچوونی کۆڕبەندی سنە و وتی: ڕێکخستنی ئەم کۆبوونەوەیە بە ئامادەبوونی حەوت پارێزگار کە هەریەکەیان بەرپرسیارێتی و بەرنامەی بەرفراوانیان هەیە، کارێکی ئاسان نەبوو. بەڵام بە سەبر و کۆڵنەدان و هەماهەنگییێکی ورد، دواجار دیدارەکە سەرکەوتووانە بەڕێوەچوو.

ناوبراو زیادی کرد: لە ماوەی چوار دەیەی ڕابردوودا کۆماری ئیسلامیی ئێران هەمیشە لە پاڵ هەرێمی کوردستان وەستاوە. هەر لە سەرەتای دامەزراندنی ڕێڕەوەکانەوە و پەرەپێدانی جادەکان تا دەگاتە سەردەمی سەختی قەیرانەکان، لەوانەش سەردەمی کۆرۆنا، کە پەیوەندیی زۆرینەی وڵاتان لەگەڵ یەکتر پچڕابوو، پەیوەندییە بازرگانی و سنوورییەکانی ئێران لەگەڵ هەرێمی کوردستان تەنانەت بۆ ڕۆژێکیش نەوەستا.

کۆنسووڵی گشتیی ئێران لە هەولێر، پەیوەندییەکانی ئێستای نێوان هەردوولای لە باشترین ئاستی مێژووییدا وەسف کرد و ڕایگەیاند: ئەمڕۆ دەرفەتێکی زێڕینە بۆ پەرەپێدانی هاوکاری لە هەموو بوارەکاندا، لەوان ئابووری، ڕۆشنبیری، ئەکادیمی، گەشتیاری، ژێرخانی ئابووری. پێویستە ئەم دەرفەتە بە پشتیوانی بەرپرسانی پارێزگاکان و هاندانی کەرتی تایبەت بەباشی کەڵکی لێوەربگیردرێت.

ئەسەدی ئاماژەی بە دەفرایەتیی بەرزی هاوکاری لە بواری گەشتیاریدا کرد و وتی: " هەرێمی کوردستان داوای کردووە بۆ گەڕاندنەوە پشکی ڕۆژانەی ٢٠ پاسی نەفەرهەڵگر لە هەرێمەوە بۆ ئێران، بەتایبەتی بۆ پارێزگاکانی ئازەربایجانی ڕۆژئاوا، کوردستان، و کرماشان".

ناوبراو ئاماژەی بەوەش دا کە کۆمپانیا ئێرانییەکان لە بوارە گرنگەکانی دروستکردنی بەنداو، دروستکردنی وێستگەی وزە، و دروستکردنی ڕێگاوبان سەرنجی دەسەڵاتدارانی هەرێمیان بەرەوخۆیان ڕاکێشاوە و لایەنی ئێرانیش بەتەواوی ئامادەیی خۆی بۆ جێبەجێکردنی پڕۆژە گەورەکان دەربڕیوە.

کۆنسووڵی گشتیی ئێران لە هەولێر ڕاشیگەیاند: "ئەمڕۆ سنوور نەک هەر هەڕەشە نییە، بەڵکوو دەرفەتێکی ئابوورییە بۆ پارێزگا سنوورییەکان". ئێمە وەک نوێنەرایەتی کۆماری ئیسلامی ئێران لە هەرێمی کوردستان، ئامادەی هاوکاری کردنین لەگەڵ بەرپرسانی هەردوولا بۆ پەرەپێدانی پێوەندییەکان.