بەپێی هەواڵی کوردپرێس، سەلاحەدین بەهائەدین، ئەمینداری گشتی یەکگرتوو لە بانگەشەی هەڵبژاردن و ناساندنی بەربژێرەکانی یەکگرتووی ئیسلامیی کوردستان گوتارێکی پێشکێش کرد و باسی بارودۆخی ناوچەکە و بانگەشەی هەڵبژاردنی کرد.

سەلاحەدین بەهائەدین دەڵێت: ''ئێمە لەکاتێکدا بانگەشە دەکەین کە ناوچەکە و هەرێمی کوردستان لە دۆخێکی ناهەمواردایە و بە ناوی بانگەشەی هەڵبژاردنەوە سنوورەکانەوە دەبەزێندرێن و لە تام دەردەچێت، ئێمە دەخوازین وەکوو یەکگرتوو ئامرازی خێر بین و خوازیاری راستکردنەوەی هەڵەکان بین، بەو هەڵەیەشەوە کە لە بانگەشەی هەڵبژاردن دەکرێت و خەریکە دۆخەکە کە خۆی چەند ناتەواوە، هێندەی دیکە ئاڵۆز دەکرێت".

سەبارەت بە قەوارەی هەرێمی کوردستان ڕایگەیاند: ''لە ستراتیژیەتی ئێمەدا جێگیرە وەکوو یەکگرتوو، ئەویش پارێزگاری کردن لە قەوارەی هەرێمی کوردستان وەکوو قەوارەیەکی فیدراڵی ئەرکە و هێڵی سوورە، شەڕی گەورەی سێیەم لەناوچەکەدا بەڕێوەیە، ئەوە ساڵێکە لە غەززە بەردەوامە و لە لوبنانیش بۆمبارانی کوێرانە دەکرێت و ئەگەری تەشەنەکردن و فراوانبوونی هەیە".

سەلاحەدین بەهائەدین پەیامێکی ئاراستەی هاووڵاتییان و خەڵک کرد، کە رۆژی 20ی ئۆکتۆبەر دەنگ بدەن و وتیشی: ''لە جیاتی ئەوەی جنیۆ بدەی و قسەی زیادە و کەم و زۆر و ئەم کافر بکەی و ئەو خائین بکەی، ئالییەتی مەدەنی هەیە و مافی خۆتە و ئەرکیشە و هەر کەسێکت بە دڵە دەنگی پێ بدە''.