بەپێی هەواڵی کوردپرێس، ئایەتۆڵڵا خامنەیی، ڕێبەری کۆماری ئیسلامیی ئیران، لە پەیامێکدا بەبۆنەی ڕووداوی شەهید بوونی سەرۆکی مەکتەبی سیاسیی بزووتنەوەی حەماس ڕایگەیاند: بە شەهید بوونی ڕێبەری ئازا و موجاهیدی دیاری فەلەستینی بەرەی گەورەی مقاوەمە تووشی ماتەمینی بوو.

 ڕێبەری باڵای شۆڕش، دەشڵێت: "ڕژێمی زایۆنیی تاوانبار و تیرۆریست میوانی ئازیزمانی لە ماڵی ئێمەدا شەهید کرد و دڵتەنگی کردین، بەڵام زەمینەی بۆ سزایەکی تووندی دژی خۆی ئامادە کرد".

ڕێبەری باڵای ئێران ڕاشیگەیاند: "شەهید هەنییە ساڵانێکی زۆر لە مەیدانی خەباتی شەرەفمەندانەدا گیانبازی بە گیانە بە نرخەکەی کرد و ئامادەی شەهیدبوون بوو، لەو ڕێگەیەدا منداڵ و کەسوکاریشی قوربانی کردبوو. ئەو لە شەهیدبوون لە ڕێگەی خودا و ڕزگارکردنی بەندەکانی خودا نەدەترسا، بەڵام ئێمە بە ئەرکی خۆمان دەزانین لەم ڕووداوە تاڵ و سەختەدا کە لە خاکی کۆماری ئیسلامی ڕوویداوە، بە دوای تۆڵەکردنەوەی خوێنی ئەودا بگەڕێین".

لە کۆتایی پەیامەکەیدا، ئایەتۆڵڵا خامنەیی پرسە و سەرەخۆشی لە گەلی ئیسلامی و بەرەی مقاوەمە، گەلی فەلەستین و بەتایبەتی بنەماڵە و کەسوکاری هەنییە و یەکێک لە هاوەڵەکانی کە لەگەڵیدا کوژراوە، کرد.