بەپێی هەواڵی کوردپرێس، شانەی ڕاگەیاندنی ئەمنی عێراق لە ڕاگەیێندراوێکدا بڵاویکردەوە شەوی ڕابردوو بە سەرپەرشتی و پلانی فەرماندەیی ئۆپەراسیۆنە هاوبەشەکان، دەزگای هەواڵگریی نیشتمانی بە بەشداری دەزگای دژەتیرۆری عێراق، پاڵپشت بە زانیاریی وردی هەواڵگری و بە هاوکاریی هێزی ئاسمانی، لە چیای پەلکانەی قەزای خورماتوو ئۆپەراسیۆنێکیان لە دژی چەکدارانی داعش کردووە.

شانەی ڕاگەیاندنی ئەمنی عێراق ڕاشیگەیاندووە: دەزگای هەواڵگریی نیشتمانیی و دەزگای دژەتیرۆری عێراق شوێنی چەکدارانی داعشیان دیاری کردووە، گەمارۆیان داون، بە فڕۆکەی ئێف ١٦ـش هێرشیان کردوونەتە سەر، بەهۆیەوە سەرجەم چەکدارەکان کوژراون، کە بەگوێرەی زانیارییە بەراییەکان ٧ چەکدارن، یەکێکیان سەرکردەیەکی مەترسیدارە.