بەپێی هەواڵی کوردپرێس، سەرۆكایەتی ئەرکانی گشتیی هێزە چەکدارەکانی ئێران لە ڕاگەیەندراوێكی لەبارەی هێرشەكەی ئیسرائیل بۆ سەر کۆماری ئیسلامیی ئێران بڵاو كردەوە كە تێیداهاتووە: "نەتەوەی بەرز و بە پەرۆشی ئێرانی ئیسلامی ئاگادار دەکەینەوە؛ فڕۆکەکانی دوژمنی زایۆنی، لە دەسدرێژکارییەکی ئاشکرا و بەپێچەوانەی یاسا نێودەوڵەتییەکان، بەرەبەیانی ئەمڕۆ شەممە، بە کەڵک وەرگرتن لەو بۆشاییەی كە لەبەردەستی سوپای تیرۆریستی ئەمریکادا لە عێراق، هێرشەكەی ئەنجام داوە".

ئاماژەی بەوەش كردووە، "ئەو شوێنە ۱۰۰کیلۆمەتر لە سنورەکانی ئێرانەوە و لە دورە، لەوێوە ژمارەیەک موشەکی ئاسمانی دور مەودا ئاراستەی هەریەكە لە پارێزگاکانی ئیلام، خوزستان و دەوروبەری پارێزگای تاران كران و  زیانێکی سنووردار و کەم کاریگەرییان لێکەوتەوە بۆ چەندین سیستەمی ڕادار کە هەندێکیان دەستبەجێ چاک دەکرێنەوە.

بەگوێرەی ڕاگەیەندراوەكە: "لەم کارە ناشەرعی و نایاساییەدا، بە ئامادەیی بەرگری ئاسمانی وڵات، ژمارەیەکی بەرچاو لە موشەکەکان ڕێگرییان لێکرا، هەروەها ڕێگری لە فڕۆکەکانی دوژمن کراوە بۆ چونە ناو ئاسمانی وڵاتەکە".

ئەوەشی خستەڕوو، "کۆماری ئیسلامیی ئێران وێڕای پاراستنی مافی یاسایی و ڕەوای خۆی بۆ وەڵامدانەوە لە کاتی گونجاودا، جەخت لەسەر دامەزراندنی ئاگربەستێکی هەمیشەیی لە غەززە و لوبنان بۆ پێشگرتن لە کوشتنی خەڵکی بێدەسەڵات و چەوساوە دەکاتەوە".

لە ڕاگەیاندراوەكەدا ئەوەش هاتووە، "حکوومەتی تیرۆریستی و تاوانکاری ئەمریکا کە ڕۆڵی ناوەندی دەگێڕێت لە پاڵپشتی کردن لە کردەوە تاوانکارییەکانی ڕژێمی زایۆنی لە تێکدانی ئاسایشی ناوچەکەدا، هۆشداری دەدرێت لە بەرگرتن لە تەشەنەسەندنی ململانێ و نائەمنی لە ناوچەکە و کوشتنی خەڵکی بێتاوان، بە تایبەت لە غەززە و لوبنان ئەم ڕژێمە نایاسایی و ناشەرعیە ڕاگیراوە و خۆی و هاوپەیمانەکانی خستۆتە ئەو تاڵاوەی کە ڕژێمی داگیرکەر دروستی کردوە".

ئەركانی گشتی ئێران داوا لە خەڵکی ئێران، میدیا، شارەزا و پسپۆڕان دەکات، "دەنگۆ و گێڕانەوەی باوەڕپێنەکراو پشتگوێ بخەن و لە ڕێگەی سەرچاوە فەرمییەکان و میدیای نیشتمانییەوە بەدواداوون بۆ هەواڵە ڕاستەکان بکەن".