بەپێی هەواڵی کوردپرێس، محەمەد شیاع سوودانی سەرۆک وەزیرانی عێراق لە پەیامێکدا رایگەیاند "پیرۆزبایی دەکەین لە ڕۆلەکانی گەلەکەمان لە هەرێمی کوردستانی عێراق و سەرۆکایەتی و حکوومەتی هەرێم و سەرجەم هێزە سیاسییەکان و کاندیدە سەربەخۆکان، بە بۆنەی ئەنجامدانی پرۆسەی دەنگدانی خولی شەشەمی هەڵبژاردنی ئەندامانی پەرلەمانی کوردستان".

ناوبراو راشیگەیاند: "درێژەدان بە هەڵبژادەی دیموکراسی بۆ ڕۆڵەکانی گەلەکەمان لە ناوچە جیاجیاکانی عێراق، جەخت دەکاتەوە لەسەر ڕێزگرتن لە بەهای دیموکراسی و باوەڕبوون بە گواستنەوەی ئاشتیانەی دەسەڵات، و چەسپاندنی پێکهاتەی دەستووری".

سوودانی هەروەها رایگەیاند: "ئەم دەستکەوتانە بەدی نەدەهات بەبێ ئەو قوربانیدانانەی کە عێراقییەکان داویانە لەپێناو ئازادی و شکۆمەندی و سەربەخۆیی بڕیارەکانیان، بۆ ژیانکردن لە وڵاتێکدا کە هەموو پێکهاتەکان مافی یەکسانیان هەبێت بەبێ جیاوازی".

محەمەد شیاع سوودانی سەرۆک وەزیرانی عێراق ئاماژەی بەوەش دا: "بەم بۆنەیەوە هەوڵەکانی کۆمیسیۆنی باڵای سەربەخۆی هەڵبژاردنەکان بەرز دەنرخێنین، بەبۆنەی سەرکەوتنی پرۆسەی هەڵبژاردن، و هیوادارین مەرجەکانی پێکهێنانی حکوومەتی نوێ بۆ هەرێمی کوردستانی عێراق تەواو بکرێت، لەپێناو بەردەوامبوونی پرۆسەی گەشەپێدان و هاوکاری و سەقامگیری بۆ خزمەتکردنی ڕۆڵەکانی گەلەکەمان لە هەرێمی کوردستان".