بەپێی هەواڵی کوردپرێس، عاسم جیهاد، وتەبێژی وەزارەتی نەوتی عێراق، بە رووداوی ڕاگەیاندووە: "حکوومەت و وەزارەتی نەوت بەوپەڕی ڕاستگۆیانە خواستی خۆیان دەربڕیوە، کە دەیانەوێت کێشە هەڵپەسێردراوەکان چارەسەر بکەن، نەوت هەناردە بکرێتەوە، بەڵام دەبێت پابەندی دەستوور و رێنمایی حکوومەت بین".
عاسم جیهاد وتیشی: "گرێبەستە نەوتییەکان گرێبەستی هاوبەشین؛ بەڵام گرێبەستەکانی وەزارەتی نەوت گرێبەستی خزمەتگوزاریین. بێگومان ئەمە گرفتە بۆ چارەسەرکردنی ئەم کێشەیە. لەگەڵ برایانی هەرێمی کوردستان و کۆمپانیا لە هەوڵ چارەسەرکردنی داین، کە گونجاوبێت و پێچەوانەی یاسا و رێنماییەکان نەبێت".
سەبارەت بەوەی ئەگەری هەیە وەزارەتی نەوت بۆ دەرهێنانی نەوت گرێبەستی نوێی نەوتی لەگەڵ کۆمپانیا نەوتییەکان لە هەرێمی کوردستان بکات. وتەبێژی وەزارەتی نەوتی عێراق وتی: "ئەمە بە هاوئاهەنگی دەکرێت لەگەڵ برایانی هەرێم، با جارێ کێشەکانی ئێستا چارەسەر بکەین ".
بەوتەی عاسم جیهاد، عێراق سوورە لەسەر پشتیوانیکردنی هەرێم. دەشڵێت: "زیادکردنی بەرهەمی هەرێم ڕەنگدانەوەی ئەرێنیی دەبێت بۆ سەر گەلی عێراق، کاتێکیش وەزارەتی نەوت کێڵگە نەوت و گازییەکانی ناوچەکانی دیکە پەرەپێدەدات، ئەوش ڕەنگدانەوەی دەبێت بەسەر برایانی و خەڵکی هەرێم. هیوادارین هەموو بە دیالۆگ کێشەکان چارەسەر بکرێن".
لەبارەی ئاستەنگەکانی بەردەم هەناردەکردنەوەی نەوتی هەرێمی کوردستان، وتەبێژی وەزارەتی نەوتی عێراق گوتی: "گفتوگۆکان لەگەڵ برایان بەردەوامە، پەیوەندییەکی باش هەیە؛ بەڵام پێویستییان بە لێکۆڵینەوە و گفتوگۆی زیاترە بۆ چارەسەرکردنی کێشە تەکنیکییەکان، لەوانە دارایی، گرێبەستەکان، یاسایی و بابەتی دیکە. دەبێ چارەسەرەکان بەگوێرەی یاسا و رێنمایی و دەستوور بێت".  
تائێستا هیچ وادەیەک بۆ هەناردەکردنەوەی نەوتی هەرێمی کوردستان دیار نییە. عاسم جیهاد ڕایگەیاند: "کێشەی ئێستا چارەسەرکردنی کێشە هەڵپەسێردراوەکانە، ڕامانگەیاندووە لاریمان لەسەر دەستپێکردنەوەی هەناردەکردنەوەی نەوت نییە ، تورکیا لاری نییە؛ بەڵام کێشەی کۆمپانیاکان هەیە، چۆن ئەمە لەگەڵ کۆمپانیا نەوتییەکانی هەرێمی کوردستان چارەسەر بکرێت. هیوادارین بە دیالۆگ و یاسا و رێنماییەکان ئەم کێشانە چارەسەر دەبن".