بەپێی هەواڵی کوردپرێس، ئۆزگور ئۆزەل، سەرۆکی گشتیی پارتی گەلی کوماری (CHP) لە گردبوونەوەیێکی پارتەکەیدا، لە ئیستانبووڵ، باسی لە پرۆسەی نوێی ئاشتی لە تورکیا و پرۆسەی چەکدانانی پارتی کرێکارانی کوردستان (پەکەکە) و چەند پرسێکی دیکەی کرد.

ئۆزگور ئۆزەل لەبارەی کۆتاییهاتنی شەڕی سوپای تورکیا و پەکەکە، دووپاتی کردەوە "بێگومان جەهەپە دەیەوێت تیرۆر کۆتایی بێت و ئارامی بێتە ئاراوە، هەروەها ئیتر دایکان نەگرین و پارەی ئەم وڵاتەش لە بری بەرەنگاربوونەوەنەی تیرۆر بە خزمەتگوزاری بدرێت".

وەکوو ئەوەی سەرۆکی گشتیی جەهەپە جەختی لێ کردەوە، پرۆسەی نوێی ئاشتی لە تورکیا "تەنیا بە گوتنی 'تورکیای بێ تیرۆر' ناکرێت و نایەتە ئاراوە. ئێمە تورکیایێکی بێ تیرۆر و دیموکراسیمان دەوێت. ئێمە بەرگری لە یەکڕیزی و ئارامی گەلەکەمان دەکەین، بەڵام ئەو کردارانەی کە دەسەڵات ئەنجامی دەدات تێکدانی یەکڕیزی و ئارامییە. ئێمە یەکڕیزی و دادپەروەریمان دەوێت، داوای ماف، یاسا و دادپەروەری بۆ هەوموان دەکەین".