بەپێی هەواڵی کوردپرێس، سەنتەری میترۆ بۆ داکۆکی لە مافی رۆژنامەنووسان بڵاویکردەوە، وریا عەبدولخالق یەکێکە لەرۆژنامەنووسەکانی هەرێمی کوردستان، ئەو لەلایەن دوو کەسەوە ڕووبەڕووی هێرش و پەلاماردانی جەستەیی بۆتەوە، ئەم هێرش و پەلامارە و هەموو جۆرە دەستدرێژییەک بۆ سەر رۆژنامەنووسان کە هەر ئامانجێکی لەپشتەوە بێت ئیدانە دەکەین و داوای کۆتایی پێهێنانی دەکەین.

سەنتەری میترۆ ڕایگەیاندووە، بۆ بەدواداچوونی لەبارەی ئەم کەیسەوە پەیوەندییان کردووە بە نوسینگەی قوباد تاڵەبانی جێگری سەرۆک وەزیرانەوە و ئەوان دڵنیاییانداوە، کە ئەو کەسانەی هێرشەکەیان کردووەتە سەر رۆژنامەنووس وریا عەبدلخالق دەستگیر کراوون بەپێی رێوشوێن و رێکارە بەرکارەکان.

هەروەها، فیدراسیۆنی ڕۆژنامەنووسان و نووسەرانی سەربەخۆ (ڕۆنووس) وێڕای سەرکۆنە و شەرمەزارکردنی ھێرشکردنە سەر وریا عەبدولخالق ڕۆژنامەنووسی دەزگای بوار و بریندارکردنی، ھیواخوازە دۆسیەکەی بەلاڕێدا نەبرێت و تاوانباران چۆن دەستگیرکراون وەھاش بە سزای خۆیان بگەیەنرێن.

ئەوەش خراوەتەڕوو، کە ئەو ڕۆژنامەنوسە لەسەر ئەنجامدانی کارێکی میدیایی زیاتر لە ساڵێک پێش ئێستا ڕووبەڕووی ئەو ھێرش و پەلامارە ناڕەوایە بوەتەوە و بەرپرسێکی سەربازیی پلەدار لە ڕێگەی پاسەوان و کەسە نزیکەکانیەوە ھەوڵی بێدەنگکردنی ڕۆژنامەنوسەکەیان داوە لەژێر زەبری چەک و چەقۆ و ھێزدا کە ئەمە یەکێکە لە مەترسیدارترین کارەکان بەرامبەر بە ڕۆژنامەنووسان.

ڕۆنووس هیواخوازە، دۆسیەکە ڕێڕەوی یاسایی خۆی وەربگرێت و بوونی پلە و بەرپرسیارێتی سەربازیی ئەنجامدەری تاوانەکە نەبێتە ھۆی پەردەپۆشکردنی تاوانەکە و بەلاڕێدابردنی، لە ھەمان کاتدا ئامادەیی تیمی پارێزەرانیشیان ڕادەگەیەنین بۆ پارێزگاریکردن لە مافی ڕۆژنامەنووسەکە و دەزگاکەی.