بەپێی هەواڵی کوردپرێس، به‌گوێره‌ی ڕاگه‌یه‌ندراوێکی سه‌رۆکایه‌تی هه‌رێم، نێچیرڤان بارزانی سه‌رۆکی هه‌رێمی کوردستان، پێشوازیی له کڵاوس شترایشه‌ر کونسوڵی گشتیی پێشوو و ئالبرێشت فۆن ڤیتکه کونسوڵی گشتیی نوێی ئه‌ڵمانیا له هه‌رێمی کوردستان کرد.
له دیدارێکدا، وێڕای ده‌ربڕینی سوپاس و پێزانین بۆ کار و ئه‌رکی کونسوڵی گشتیی پێشوی ئه‌ڵمانیا، ماڵئاوایی لێکرد و هیوای سه‌رکه‌وتنی له ئه‌رکی نوێیدا بۆ خواست، هه‌روه‌ها به‌خێرهاتنی کونسوڵی گشتیی نوێی ئه‌ڵمانیای کرد و هه‌موو پشتگیرییه‌کی لایه‌نه په‌یوه‌ندیداره‌کانی هه‌رێمی کوردستانی بۆ سه‌رخستنی ئه‌رکه‌که‌ی نیشاندا.
لای خۆیه‌وه شترایشه‌ر خۆشحاڵیی خۆی به ماوه‌ی کارکردنی له هه‌رێمی کوردستان ده‌ربڕی و ستایشی پشتگیریی لایه‌نه په‌یوه‌ندیداره‌کانی بۆ سه‌رخستنی ئه‌رکه‌که‌ی کرد، کونسوڵی گشتیی نوێی ئه‌ڵمانیاش وێڕای نیشاندانی خۆشحاڵی به ده‌ستبه‌کاربونی، پشتگیری و خواستی وڵاته‌که‌ی بۆ بره‌ودان به په‌یوه‌ندییه‌کانی له‌گه‌ڵ هه‌رێمی کوردستاندا دووپات کرده‌وه.
له دیداره‌که‌دا باس له دۆخی عێراق و هه‌رێمی کوردستان و هه‌ڵبژاردنی په‌رله‌مانی کوردستان کرا، له‌مباره‌یه‌وه نێچیرڤان بارزانی جه‌ختی له گرنگیی هه‌ڵبژاردن و سه‌رخستنی پرۆسه‌ی ده‌نگدان بۆ هه‌رێمی کوردستان کرده‌وه و وتیشی: "له هه‌ڵبژاردندا گه‌لی کوردستان براوه‌یه و هه‌موو لایه‌ک ده‌بێ هه‌وڵ بده‌ن هه‌ڵبژاردن له که‌شێکی ئارام و هێمندا به‌ڕێوه‌بچێت".
Your Comment