بەپێی هەواڵی کوردپرێس، کەناڵ ۸ لە هەواڵێکدا بڵاوی کردەوە دادگاى کارگێڕی داواکەی ڕاکان جبوورىی لەبارەی کۆبوونەوەکەی ۱۰ـی ئاب لە هۆتێل ڕەشیدی بەغداد کە حکوومەتى خۆجێیى کەرکووک پێکهێندرا دەڵێت: مەرجەکانى دەرکردنى فەرمانى سالاریى تێدا نییە.

پێشتریش دادگاى باڵاى فیدراڵيى عێراق سکاڵاى هەریەک لە حەسەن تۆران، سەرۆکى بەرەى تورکمانى عێراقى و سۆسەن عەبدولواحید، ئەندامی ئەنجوومەنی پارێزگای کەرکووکى ڕەت کردەوە، کە لەسەر سەرۆک‌کۆماری عێراق لەبەرامبەر دەرکردنی مەرسوومی کۆماریی بۆ پارێزگاری نوێی کەرکووک و ئەو ۹ ئەندامەی ئەنجوومەنی پارێزگاکە تۆماریان کردبوو داوایان کردبوو, دادگای باڵای فیدراڵی بە فەرمانێکى سالاریی دانیشتنەکە و دەرەنجامەکانی پووچەڵ بکاتەوە.

دادگا لە وەڵامى سکاڵاکارەکانى پێکهاتەى تورکماندا دەڵێت، بابەتەکە هیچ هۆکارێکى تێدانییە بۆ ئەوەى سیفەتى بەپەلەى پێبدرێت و داواکە ڕەت دەکەنەوە، چوونکە دژى ماددەى ۹۴ـى دەستوورى عێراق و ماددەى ۵ـى یاساى دادگاى فیدراڵییە.

سکاڵاکان لەکاتێکدایە، ۹ ئەندامى ئەنجوومەنى پارێزگاى کەرکووک، لە کۆى ۱۶ ئەندام، شەوى ۱۰ـی ئاب لە هۆتیل ڕەشید لە بەغداد کۆ بوونەوە، لە کۆبوونەوەکەدا بڕیار درا بە هەڵبژاردنى ڕێبوار تەها، بە پارێزگارى کەرکووک و محەمەد حافز، وەک سەرۆکى ئەنجوومەنى پارێزگاى کەرکووک، بەشێک لە عەرەبەکانى کەرکووک و بەرەى تورکمانیی ڕایانگەیاند، کۆبوونەوەکەى ئەنجوومەنى پارێزگا نایاساییە و لە دادگاى فیدڕاڵى ساکاڵایان تۆمارکرد داواى ڕاگرتنى رێکارەکانى ناو کۆبوونەوەکەیان کرد.