بەپێی هەواڵی کوردپرێس، به‌گوێره‌ی ڕاگه‌یه‌ندراوێکی سه‌رۆکایه‌تی هه‌رێمی کوردستان، به‌یانیى ئه‌مڕۆ پێنجشه‌ممه نێچیرڤان بارزانى، سه‌رۆکى هه‌رێمى کوردستان، پێشوازىی له جەنەراڵ جۆول ڤاوڵ فەرماندەی گشتیی هێزەکانی هاوپەیمانان لە عێراق و سووریا و شاندێکی یاوەری کرد.
لە کۆبوونەوەکەدا دۆخى ئه‌منى و مه‌ترسییه‌کانى تیرۆر و هه‌ڕه‌شه‌کانى داعش له‌سه‌ر ئاسایش و ئارامى له عێراق و سووریا تاوتوێ کران و جه‌خت له پێویستیى به‌رده‌وامیى هاریکاریى هاوبه‌ش و هه‌ماهه‌نگى له‌نێوان پێشمه‌رگه و سوپاى عێراق و هێزه‌کانى هاوپه‌یماناندا کرایه‌وه.
هەروەها له ڕاگه‌یه‌نراوه‌که‌دا هاتووه، وه‌زیرى کاروبارى پێشمه‌رگه و سوپاسالارى پێشمه‌رگه ئاماده‌ى ئەو کۆبوونەوە بوون و داکۆکى له سه‌رخستنى پرۆسه‌ى چاکسازى له وه‌زاره‌تى کاروبارى پێشمه‌رگه و یه‌کخستنه‌وه‌ى پێشمه‌رگه کرایه‌وه، له‌مباره‌یه‌وه هه‌ردوولا له‌سه‌ر گرنگیى پشتیوانی کردنى پرۆسه‌که و نه‌هێشتنى ته‌گه‌ره‌کانى به‌رده‌مى، هاوڕا بوون.
Your Comment