بەپێی هەواڵی کوردپرێس، ئەنجومەنی سەربازیی مه‌نبج له ڕاگه‌یه‌ندراوێكدا باسی له‌وه‌كردووه، پاشنیوه‌ڕۆی ئه‌مڕۆ یه‌كشه‌ممه گرووپه چه‌كداره‌كانی سووریا به پشتیوانی ده‌وڵه‌تی توركیا هێرشیان كرده سه‌ر مه‌نبه‌ج و هه‌وڵی كۆنتڕۆڵ كردنی ده‌ده‌ن.
ئاماژه‌ی به‌وه‌ش كردووه، "لە ماوەی ۱۲ ڕۆژی ڕووداوەکانی ئەم دواییەی سووریا، بەکرێگیراوانی دەوڵەتی تورکیا بە پشتیوانی ئاسمانیی توركیا هێرشیان كردوه‌ته سەر ناوچەی مەنبج و لادێکانی، هەموو ئەو هێرشانە لەلایەن هێزەکانی مەنبج و ئەلبابەوە تێکشکێندران".
لە ڕاگەیەندراوەکەدا هاتووە: "چەتەکان لە دوو ڕۆژی ڕابردوودا هێرشەکانیان بۆ سەر هەموو میحوەرەکانی مەنبج زیاد کردووە، ئێستا شەڕی توند لە نێوان شەڕڤانانمان و چەتەکان تا بەرەکانی عەین دادات و عەرەب حەسەن و ئەلعەریمە ڕوودەدات".
ئه‌وه‌ش خراوه‌ته‌ڕوو، "پاشنیوەڕۆی ئەمڕۆ، کۆمەڵێک چەت بە پاڵپشتی ئاسمانی سوپای تورکیا و زرێپۆشەکان بەرەو دەروازەی باشووری شارەکە پێشڕەوییان کرد و ویستیان فشاری دەروونی دروست بکەن، بەڵام کەوتنە بۆسەی هێزەکانمانه‌وه، جگە لەوەش بەشێک لە شانە نهێنییەکانی باندەکان، بە ئامانجی دروستکردنی فشاری دەروونی لەسەر خەڵک و چاندنی ترس ده‌ستیان به هێرشكردووه، ئێستا لە دەروازەی باشووری شارەکە پێکدادان هەیە".
Your Comment