بەپێی هەواڵی کوردپرێس، كۆمیتەی ناوەندیی پارتی بە سەرۆكایەتی مەسعوود بارزانی كۆ بوونەوە و دوای كۆبوونەوەكە لە ڕاگەیەندراوێكدا بڵاویكردەوە: "پڕۆسەى هەڵبژاردن بەو ڕێکارانەى کە کۆمسیۆنى باڵاى سەربەخۆى هەڵبژاردنەکانى عێراق دیاریکردن بەڕێوەچوو، لەگەڵ بوونى هەندێک تێبینى، پرۆسەکە سەرکەوتووانە ئەنجامدرا".

ئاماژەی بەوەش كرد، "تەواوى بەرپرس و کادیرانى پارتى لە دامودەزگاکانى حکوومەت و پێشمەرگە و هێزە ئەمنیەکانیان بەوپەڕى دڵسۆزى و لێهاتوییەوە بەشدارى بەرێوەچونى پڕۆسەى هەڵبژاردن بون و بەشێوازێکى شارستانیانە ڕەفتاریان نواند، چ لەکاتى هەڵمەتى هەڵبژاردن و چ لەکاتى بەرێوەچونى پڕۆسەکە".

بەگوێرەی ڕاگەیەندراوەكە، "لە رێگاى پڕۆسەیەکى دیموکراتییەوە پارتی پێشەنگیى پاراست وەکو حزبى ژمارە یەکى کوردستان، هەم لەڕوى ژمارەى دەنگ و هەمیش لە ڕوى کورسى پەرلەمانى لە سەروى هەمو لایەنەکان مایەوە".

ئەوەشی خستەڕوو، "سەرکەوتنى پڕۆسەى هەڵبژاردنى بە سەرکەوتنى دیموکراسیەت لە کوردستان ناوزەدکر و، لە ئێستادا پارتیمان چاوەڕێى ئەنجامەکانى کۆتایى هەڵبژاردن دەکات بۆ هەنگاونانى قۆناغى دواى هەڵبژاردن".

كۆمیتەی ناوەندی پارتی باسی لەوەش كرد، "هیوادارین کێشە و ئاڵۆزییەکانى ناوچەکە کە ڕۆژ لەدواى ڕۆژ لە پەرەسەندندان بە دیالۆگ چارەسەربکرێن بەبێ زمانى هەڕەشە و بەکارهێنانى چەک، هەروەها داواکارىن عێراق خۆى بەدوربگرێت و لەو کێشانە تێوەنەگلێندرێت، چونکە بارودۆخى عێراق زۆر هەستیارە و ئالنگارى زۆرى لەبەردەمدا هەیە".

لە ڕاگەیەندراوەكەدا ئەوەش هاتووە: "لە پێناو پاراستنى بەرژەوەندییە باڵا نەتەوەیى و نیشتمانییەکان و پاراستنى قەوارەى دەستورىى هەرێم، پارتیمان ڤیتۆى لەسەر هیچ کەس و لایەنێک نیە و ئەوەى لاى پارتى پێشینە و گرنگە لەم قۆناغەدا پاراستنى قەوارەى هەرێم و هەبونى یەک حکومەتى سەرتاسەرى و پاراستنى ماف و ئازادییەکانى خەڵکى کوردستان و خزمەتکردنى هاوڵاتیانە، بۆ ئەم مەبەستە کۆبونەوە دەسەڵاتىدا بە مەکتەبى سیاسى کە بە گوێرەى پێویست بەرنامەڕێژى بکات و هەنگاوى گونجاو بنێت".