بەپێی هەواڵی کوردپرێس، بافڵ جه‌لال تاڵه‌بانی له په‌یامێكدا بڵاویكرده‌وه، "ئه‌مڕۆ به‌خۆشحاڵییه‌كی زۆره‌وه پێشوازیمان له مه‌سعوود پزیشكیان سه‌رۆک كۆماری ئیسلامیی ئێران كرد، سه‌ردانه مێژوییه‌كه‌ی گرنگییه‌كی تایبه‌تی هه‌یه بۆ عێراق، هه‌رێمی كوردستان و به تایبه‌ت سلێمانی و یه‌كێتیی نیشتمانیی كوردستان، ئه‌م سه‌ردانه درێژكراوه‌ی په‌یوه‌ندییه قووڵ و له‌مێژینه‌كه‌ی نێوان ئێمه و گه‌لی كۆماری ئیسلامیی ئێرانه كه سه‌رۆک مام جه‌لال ئه‌ندازیار و بناغه‌دانه‌ری بووه".
تاڵەبانی ڕاشیگه‌یاندووه، له‌دیداره‌كه‌مان له‌گه‌ڵ پزیشكیان جه‌ختمان له پابه‌ندییه‌كانی هه‌رێمی كوردستان كرده‌وه به‌رامبه‌ر ئاسایش و سه‌قامگیریی وڵاتانی دراوسێ به‌تایبه‌ت گه‌لی ئێرانی دۆست و دووپاتمان كرده‌وه، "ڕێگه‌ناده‌ین و نامانه‌وێت هه‌رێمی كوردستان ببێته جێگه‌یه‌ک بۆ هێرشكردنه‌سه‌ر سه‌روه‌رییه‌كانی وڵاتانی دراوسێ به‌تایبه‌ت كۆماری ئیسلامیی ئێران، به‌ڵكوو ئه‌وه‌ی ئامانجمانه و هه‌نگاوی بۆ ده‌نێین فراوانتركردن و په‌ره‌پێدانی په‌یوه‌ندییه دێرینه‌كه‌مانه له چوارچێوه‌ی پاراستنی به‌رژه‌وه‌ندییه باڵا و نیشتمانییه‌كاندا".
ئه‌وه‌شی خستۆته‌ڕوو، له‌درێژه‌ی دیداره‌كه‌دا سوپاس و پێزانینی خۆمان ئاڕاسته‌ی سه‌ركردایه‌تیی و گه‌لی ئێران كرد كه له سه‌رجه‌م قۆناغه سه‌خته‌كاندا هاوكار و پشتیوانی خه‌ڵكی كوردستان بون، هه‌روه‌ها له ڕووبه‌ڕووبوونه‌وه‌ی تیرۆر و تێكشكاندنی داعشدا، ڕۆڵێكی گرنگ و به‌رچاویان گێڕا و هاوخه‌باتی كوردستان و هێزه‌كانی پێشمه‌رگه بوون، "ئاماژه‌مان به‌وه‌ش كرد، ئێمه هاوكاری و برایه‌تیی دۆسته‌كانمان له‌یاد ناكه‌ین و درێژه‌پێده‌ری ئه‌و سیاسه‌ته ده‌بین كه سه‌رۆک مام جه‌لال په‌یڕه‌وی ده‌كرد و ئامانجه‌كه‌ی پاراستنی به‌رژه‌وه‌ندییه باڵا هاوبه‌شه‌كان بوو.
له‌به‌رامبه‌ردا پزیشكیان ستایشی رۆڵ و پێگه‌ی كاریگه‌ری مام جه‌لالی كرد له بونیادنانی عێراقی نوێ و داڕشتنه‌وه‌ی سیاسه‌تێكی حه‌كیمانه له‌گه‌ڵ وڵاتانی دراوسێ به‌تایبه‌ت ئێران و ئاماژه‌یان به‌وه‌كرد، "ئێمه ڕێز له‌و په‌یوه‌ندییه مێژوییه ده‌گرین و هیوادارین گه‌شه‌ی زیاتری پێبده‌ین، له‌به‌رامبه‌ر هه‌وڵ و هه‌نگاوه نیشتمانییه‌كانیشتاندا بۆ پاراستنی ئارامی و سه‌قامگیریی عێراق و هه‌رێمی كوردستان، هاوكار و پشتیوانتان ده‌بین".
سه‌رۆكی یه‌كێتیی نیشتمانیی كوردستان دوای كۆبوونه‌وه‌كه‌ی له‌گه‌ڵ مه‌سعوود پزیشكیان سه‌رۆک كۆماری ئێران له سلێمانی رایگه‌یاند، ڕێگه‌ناده‌ین و نامانه‌وێت هه‌رێمی كوردستان ببێته جێگه‌یه‌ک بۆ هێرشكردنه‌سه‌ر سه‌روه‌رییه‌كانی وڵاتانی دراوسێ به‌تایبه‌ت كۆماری ئیسلامیی ئێران.
News Code 224072
Your Comment