کامەران عوسمان، ئەندامی تیمی کوردستانیی عێراقیی رێکخراوی CPTـی ئەمریکی بە کەناڵ۸ـی ڕاگەیاندووە: کاتژمێر ۵:۳۰ بەیانیی ڕۆژی ۲۰ی ۸ی ۲۰۲۴ فڕۆکە جەنگییەکانی تورکیا چوار جار بۆردوومانی باسکی بێرییان و گوندی گوندەژۆرییان لە دەڤەری باڵەکایەتی لە شارۆچکەی چۆمان کردووە.
ناوبراو گوتیشی، هەر ئەمڕۆ کاتژمێر ۶:۴۸ بەیانی، فڕۆکە جەنگییەکانی تورکیا چوار جار بۆردوومانی شاخی برزووت و کڵاوەیان لە گوندی گەڵاڵە لە قەزای ماوەت کردووە.
لەبارەی زیانەکانەوە، کامەران عوسمان گوتی، لە ئەنجامی ئەو بۆردوومانانەدا هیچ هاوڵاتییەکی مەدەنی نەبوونەتە قوربانی، بەڵام بەشێک لە پوش و پاوان و دارستانی ئەو شاخانە سووتاون.
لەماوەی ڕابردوودا سوپای توركیا ژمارەیەكی زۆر سەرباز و چەكی هێناوەتە ناو خاكی هەرێمی كوردستان و چەندین بنكە و خاڵی پشكنینی داناوە، سنورى ناوچەکانى قەزاى ئامێدى لە پارێزگاى دهۆک، ماوەت و پێنجوێن لە پارێزگاى سلێمانى، زۆرترین بۆردوومانیان لەسەرە.
بەگوێرەی ئامارەکانی رێکخراوى سى‌پى‌تى ئەمریکی، ئەمساڵ بەهۆی بۆردوومانەکانی تورکیاوە ۹ هاونیشتمانیی گیانیان لەدەست داوە، کە پێنجیان لە چیای گارەبوون لە ئامێدی، سێ لە سنووری سیدەکان و یەک هاونیشتمانییش لە سلێمانی بووە، هاوکات دوو هاونیشتمانیش لەمساڵدا بەهۆی بۆردوومانەکانەوە بریندار بوون.
Your Comment