جومعە محەمەد شرۆڤەکاری سیاسیی کوردی سووریا لە گفتوگۆ لەگەڵ کوردپرێسدا ئاماژەی دا بە ئەو هەڕەشانەی کە پاش ڕووداوەکانی ئەفغانستان لەسەر ئیدارەی خۆسەر هەیە و وتی: هەردەم ئەگەری هێرشی تورکیا بۆسەر ناوچەکانی بەڕێوەبەریی خۆسەری کوردستانی سووریا لە ئارادایە.

ناوبراو درێژەی دا: تورکیا هەر دەرفەتێک بۆ هێرش کردن دەقۆزێتەوە و لەم ماوەیەشدا ناوچە سنوورییەکانی تۆپباران کردووە و بە فڕۆکەی بێ فڕۆکەوان خەڵک و ئۆتۆمبیلەکان دەکاتە ئامانج.

ڕۆژنامەنووسە کوردەکە ڕاشیگەیاند: ئامانجی تورکیا داگیرکردنی قووڵایی سی کیلۆمەتریی سنوورەکەیە و ئەگەر ئەمریکا و ڕووسیا گڵۆپی سەوزی بۆ هەڵ بکەن هێرش دەکات.

جومعە محەمەد وەبیری هێنایەوە: هەرچەند کە بەرپرسانی ئەمریکی ڕایانگەیاندووە هیچ نییەتێکیان بۆ کشانەوە لە باکووری سووریا نییە بەڵام چیدی خەڵک متمانەیان بە ڕووسیا و ئەمریکا نەماوە و هێشتا ڕووداوەکانی عەفرین و سەرێکانی و گرێ سپی-یان لەیاد نەکردووە.

ناوبراو ئاشکراشی کرد کە بەڕێوەبەرایەتیی خۆسەر خەریکی دانوستاندنە لەگەڵ ڕووسیا و حکوومەتی ناوەندیی سووریا، بەڵام حکوومەتی ناوەندیی هیچ دەرەچەیێکی بۆ دانوستان و چارەسەرکردنی پرسی سووریا نەهێشتۆتەوە و لەسەر سیاسەتەکانی خۆی مکووڕە.

ئەم شرۆڤەکارە سیاسییە وتیشی: خەڵک متمانەیان بە هێزەکانی خۆیان، واتا هێزەکانی سووریای دیموکرات-ە. چوونکە ئەم هێزە تەنها هێزێکە کە هەم لەبواری سەربازی و هەم لە بواری سیاسییەوە خزمەت بە ئارامی و ئاسایشی سووریا دەکات و بەدوای چارەکردنی کێشەکاندایە.

ناوبراو زیادی کرد: هیوادارین نوێنەرایەتیی ئیدارەی خۆسەر بەشێوەی فەرمی لەلایەن کۆمەڵگای نێونەتەوەییەوە بناسێندرێت چوونکە پێشتر لە وڵاتانی ئەورووپی لەوان سویسڕا نووسینگەکەی کراوەتەوە.

کۆدی هەواڵنێر: 60113