بەپێی هەواڵی کوردپرێس، لە ڕاگەیەندراوەکەدا قوباد تاڵەبانی جێگری سەرۆک وەزیرانی هەرێمی کوردستان دەڵێت، کوشتنی ئەم دوو ڕۆژنامەوانە تاوانێکی پاساوهەڵنەگرە و دژی هەموو جۆرە یاسا و نەریتێکی نێودەوڵەتییە و بە توندی ئیدانەی دەکەین. جگە لەوەش پێشێلکردنێکی زەقی سەروەری خاکی عێراقە.
دەشڵێت، جارێکیتر داوا لە حکوومەتی فیدراڵ و کۆمەڵگای نێودەوڵەتی دەکەین سنوورێک بۆ ئەم پێشێلکارییانە دابنێن کە بوونەتە هەڕەشەیەکی جدی بۆ سەر ژیانی هاوڵاتیانی مەدەنی لە هەرێمی کوردستان. بەم بۆنەیەوە سەرەخۆشی لە خانەوادە و کەسوکاری هەردوو رۆژنامەنووسی شەهید دەکەم و هیوای چاکبوونەوەی خێراش بۆ بریندارەکە دەخوازم.
ئەو لێدوانە لەکاتێکدایه دژەتیرۆری کوردستان/ پارتی لە ڕاگەیەندراوێکدا قوربانییەکانی هێرشەکەی سەیدسادقی بە بەرپرس و چەکداری پەکەکە ناساندبوو.
ئەمڕۆ لەهێڕشێکی درۆنی تورکیادا لە سەیدسادق دوو ڕۆژنامەنووس شەهید و یەکێکی دیکەش برینداربوون.
Your Comment