بەپێی هەواڵی کوردپرێس، سەعدی ئەحمەد پیرە وتەبێژی یەکێتیی نیشتمانیی کوردستان ڕایگەیاند، پابەندن بە وادەی هەڵبژاردنی پەرلەمانی کوردستان کە لە ڕۆژی ۱۰ی مانگی (حوزەیران/۶)ی ئەمساڵ لەلایەن نێچیرڤان بارزانی سەرۆکی هەرێمی کوردستان بڕیاری لەسەر دراوە.

ناوبراو ئاماژەی بەوەشکردوە، یەکێتی ڕای وایە هەڵبژاردنی  پەرلەمانی کوردستان باشترین ڕێگایە بۆ قووڵکردنەوەی زیاتری دیموکراسی و تێپەڕاندنی ئەم بارودۆخە ئاڵۆزەی ناوخۆ و ناوچەکە بە گشتی.

ئەوەشی خستوەتەڕوو، چالاککردنەوەی پەرلەمان گرنگە بۆ ئەنجامدانی ئەرکە یاسایی و سەرەکییەکانی و چارەسەرکردنی کێشە و گرفتە فرە رەهەندەکانی کۆمەڵانی خەڵکی کوردستان.

ڕۆژی دووشەممە مه‌كته‌بی سیاسیی پارتی دیموکراتی کوردستان ڕایگەیاند، بە بەرژەوەندی گەل و نیشتمانەکەمانی دەزانین كە پارتی نەچێتە ژێر باری پەسەندکردنی بریاری نادەستووریی و سیستەمێکی سەپێنراو لە دەرەوەی ئیرادەی گەلی هەرێمی كوردستان و دامەزراوە دەستوورییەکانی و بەشداری هەڵبژاردنێک نەكات کە بە نایاسایی و نادەستووری و لەسایەی سیستەمیکی سەپێنراودا بەڕێوەبچێت.