بەپێی هەواڵی کوردپرێس، لەسەر بنەمای ڕاپۆرتە بڵاوکراوەکان، گفتوگۆکان لەسەر داڕشتنی "یاسایەکی چوارچێوەیی" لە پێوەندی لەگەڵ پرۆسەی سیاسیی ئێستادا، پێی ناوەتە قۆناغێکی نوێوە. لەم چوارچێوەیەدا، ئەندامانی شاندی ئیمرالی و بەرپرسانی باڵای پارتی داد و گەشەپێدان (ئاکەپە) لە ڕۆژانی ڕابردوودا لە پەرلەمانی تورکیا کۆ بوونەتەوە و بیروڕایان لەسەر تەوەرە گشتییەکانی ئەم گەڵاڵەیە گۆڕیوەتەوە.

دەوترێت لەم کۆبوونەوەیەدا، جیا لە پێداچوونەوە بە ئەنجامەکانی سەردانی ٢٤ی مەی شاندی ئیمرالی بۆ زیندانی ئیمرالی، بابەتەکانی پێوەست بە چوارچێوەی یاسایی و یاسادانانی پرۆسەکەش تاوتوێ کراون. سەرچاوەکانی نزیک لە دانوستانەکان، ئەم ڕاوێژانەیان وەک بەشێک لە هەوڵەکان بۆ داڕشتنی ڕەشنووسێکی سەرەتایی و دۆزینەوەی خاڵە هاوبەشەکانی نێوان لایەنەکان وەسف کردووە.

بە گوێرەی ڕۆژنامەی "ئۆزگور پۆلیتیکا"، هێشتا دەقێکی کۆتایی یان ڕێککەوتنێکی دیاریکراو لەسەر ناوەڕۆکی گەڵاڵەکە پێکنەهاتووە و دانوستانەکان لە قۆناغە سەرەتایییەکاندان. چاوەڕوان دەکرێت لەگەڵ بەردەوامیی گفتوگۆکان و ڕوونبوونەوەی زیاتری پێویستییە یاسایی و سیاسییەکان، نەخشەڕێگەی ئەم پرۆسەیەش ڕوونتر ببێتەوە.

هەروەها ڕاگەیەندراوە کە شاندی ئیمرالی و دەم پارتی لە ڕۆژانی داهاتوودا لەگەڵ نەعمان کورتوڵموش، سەرۆکی پەرلەمانی تورکیا کۆدەبنەوە. ئامانجی ئەم کۆبوونەوانە پێداچوونەوە بە ڕێکارەکانی خێراکردنی پرۆسەکە و هەڵسەنگاندنی ڕۆڵی ئەگەریی پەرلەمان لە داڕشتن و پەسندکردنی چوارچێوە یاسایییە داواکراوەکە ڕاگەیەندراوە.

لە ڕاپۆرتەکەدا هاتووە کە یاسای جێی باس، لە ناوەندە سیاسییەکاندا بە ناونیشانی وەک "یاسای چوارچێوە"، "یاسای ئاشتی" یان "یاسای ڕاگوزەر" دەناسرێت و ئامانجی دروستکردنی بەستێنی یاسایی پێویستە بۆ قۆناغی گواستنەوە و بەڕێوەبردنی گۆڕانکارییە ئەگەرەییەکانی داهاتوو.

هەندێک لەو بابەتانەی کە دەوترێت لەم ڕەشنووسەدا پێداچوونەوەیان بۆ دەکرێت بریتین لە: دیاریکردنی دۆخی یاسایی ئەو ئەندامانەی گرووپەکان کە چالاکیی چەکدارییان ڕاگرتووە، پێداچوونەوە بە هەندێک ماددەی یاسایی پێوەست بە بەرەنگاربوونەوەی تێرۆر و یاسای سزادان، و هەروەها لێکۆڵینەوە لەو ڕێسایانەی تایبەتن بە جێبەجێکردنی سزاکان و مەرجە یاسایییەکانی بەردەوامبوونی دانوستانەکان. سەرەڕای ئەمانەش، هێشتا هیچ دەقێکی فەرمی یان کۆتایی لەم گەڵاڵەیە بڵاونەکراوەتەوە.

بە وتەی سەرچاوە ئاگادارەکان، ڕاوێژەکان لە حەفتەکانی داهاتوودا بەردەوام دەبن و زانیاریی زیاتر دوای پێشکەوتنی دانوستانە سەرەتایییەکان ئاشكرا دەکرێت.