بەپێی هەواڵی کوردپرێس، فەرمانگەی پەیوەندییەکانی دەرەوەی سەرۆکایەتیی کۆماری تورکیا بڵاوی کردەوە، سەرۆککۆماری تورکیا لە پەیوەندییێکی تەلەفۆنیدا لەگەڵ هاوتا ئێرانییەکەی تاوتوێی شەڕ و گرژییەکانی نێوان ئێران و ئیسرائیلیان کردووە.

ئەردۆغان لە پەیوەندییە تەلەفۆنیەکەدا هێرشەکەی ئیسرائیلی بۆ سەر ئێران بە نایاسایی و پێشلکاری وەسف کرد و شەرمەزاری کرد.

سەرۆکی تورکیا هەروەها وتی: "ئیسرائیل دەیەوێت تەواوی ناوچەکە ڕابکێشێتە نێو ئاگر. نەتەنیاهوو بەو هێرشانەی دەیەوێت، دانوستاندنەکانی بەرنامەی ئەتۆمی لەبار ببات. هەروەها هەوڵدەدات بەو هێرشانە سەرنجی جیهان لەسەر کۆمەڵکوژیی غەززە لابدات".

ئەمە لەکاتێکدایە پێشتر ئەردۆغان لە دوو پەیوەندیی تەلەفۆنیدا لەگەڵ هەریەک لە محەممەد سەلمان، شازادەی جێنشینی سعوودیە و شا عەبدوڵڵای ئوردن قسەی کردبوو و تاوتوێی هەمان بابەتی لەگەڵ ئەوانیش کردبوو.