بەپێی هەواڵی کوردپرێس، فەرامەرز ئەسەدی، کۆنسووڵی گشتیی کۆماری ئیسلامیی ئێران، سەردانی دیوانی پارێزگای هەولێری کرد و بانگهێشتنامەی فەرمیی ئێرانی بە ئومێد خۆشناو، پارێزگاری هەولێر دا بەمەبەستی بەشداریکردن لە پێشانگەی 'ئێران-ئێکسپۆ ۲۰۲۵.

لای خۆیەوە پارێزگاری هەولێر خۆشحاڵی خۆی بەم بانگهێشتنامەیە دەربڕی و جەختی لە پتەو کردنی پەیوەندییەکانی نێوان هەرێمی کوردستان و کۆماری ئیسلامیی ئێران کردەوە، بەتایبەت لەبواری جموجۆڵی بازرگانی و گەشەپێدانی پەیوەندییە ئابوورییەکان.

لە دیداری پارێزگاری هەولێر و کونسوڵی گشتیی ئێران، گفتوگۆ لەبارەی ئامادەکارییەکان بۆ کۆبوونەوەی فراوانی پارێزگارانی (هەولێر، ئازەربێجانی ڕۆژئاوا، سلێمانی، سنە، دهۆک و کرماشان) کرا کە بڕیارە لە ڕێککەوتی ۲۰-۵-۲۰۲۵ لە شاری سنە بەڕێوە بچێت، هەردوولا لەسەر وردەکاریی سەردانەکە و چۆنیەتی بەڕێوەچوونی کۆبوونەوەکان هاوڕا بوون.