بەپێی هەواڵی کوردپرێس، لە ڕاپۆرتێکدا تۆڕی میدیایی ڕووداو بڵاوی کردەوە: باڵی گردی زەرگەتەی جڤاتی نیشتمانیی بزووتنەوەی گۆڕان دەڵێت، ۵ـی نیسان سێیەمین کۆنفرانسی نیشتمانی دەبەستن. باڵی کوردساتیش، جەختی لە بەستنی کۆنگرە کردەوە و لە راگەیێندراوێکدا گوتی: "چەند کەسێک، بەیاننامەیەکیان بەناوی جڤاتی نیشتمانییەوە بڵاو کردووەتەوە، کە کەمینەیەکی تەوریسچین، گوایە کۆنفرانس لە گردی زەرگەتە ئەبەستن".

لە راگەیێندراوەکەیاندا هاتووە، هەموو لایێک دڵنیا دەکەینەوە، بزووتنەوەی گۆڕان بە هەماهەنگی و لەژێر چاودێری ئەنجوومەنی کۆمیسیارانی کۆمسیۆنی باڵای سەربەخۆی هەڵبژاردنەکانی عێراق کۆنفرانس گرێ دەدا. ئەم کۆنفرانسەش لە کات و شوێنێک دەبێت، کە گونجاو بێت بۆ بەڕێوەبردنی ئەم رێکارە رێکخراوەییە. بۆ ئەو مەبەستەش ئامادەکاری کراوە.

نزار مه‌حموود ساڵح، ئەندامی‌ جڤاتی‌ نیشتمانیی‌ بزووتنەوەی گۆڕان (باڵی گردی زەرگەتە) بە تۆڕی میدیایی رووداوی راگەیاند: "ئێمە کاتی کۆنگرەمان دیاریکردووە، ئەو کەسانەی کە ناویان لە لیستدا هەیە، دەتوانن بەشداری بکەن، ئەگەر بەشدارییان نەکرد، خۆیان بەرپرسن".

بزووتنەوەی گۆڕان بەسەر دوو بەرە (گۆڕانی گردی زەرگەتە و گۆڕانی گەڕەکی کوردسات) دابەش بووە. بەرەی گەڕەکی کوردسات، دووی شوباتیان بۆ بەستنی کۆنگرە دیاری کردبوو، بەڵام کۆمیسیۆنی باڵای سەربەخۆی هەڵبژاردنەکانی عێراق ۲۹ـی کانوونی دووەم رایگەیاند، ''پەلە نەکرێت لە بەستنی کۆنگرە لەو رێککەوتەدا. بە گوێرەی ئەو داوایەی لە دەستەی گشتیی حیزبەکەوە نێردراوە".

بە گوێرەى نووسراوێک کە هەیمان تەحسین، بەڕێوەبەرى فەرمانگەى کاروبارى پارت و رێکخراوە سیاسییەکانى سەر بە کۆمیسیۆنى باڵاى سەربەخۆى هەڵبژاردنەکان لە ۲۶ـى ئادارى ۲۰۲۵، ئاراستەى نووسینگەى سلێمانیى کۆمیسیۆنى کردووە، ئاماژەى بەوە داوە کە لەسەر بنەمای داواکارییەکی نوێ کە دەستەى گشتیی بزووتنەوەى گۆڕان پێشکێشکی کردووە، کاژێر ۱۰ـى بەیانی، ۵ـی نیسانى ۲۰۲۵، کۆنگرەى بزووتنەوەى گۆڕان دەکرێت.  

ئەو وادەیە لەسەر بنەمای بڕیارێکى ئەنجوومەنى کۆمیسیاران بووە کە ۴ـى ئادار دەریکردبوو کە دەبێت تاوەکوو ۱۰ـى نیسان ئەو کۆنگرە بکرێت.

ناکۆکییەکان لە چییەوە دروستبوون؟

۱۹ـى ئەیلوولی ۲۰۲۴، عومەر سەید عەلی، رێکخەری گشتیی بزووتنەوەی گۆڕان، بریکارنامەی گشتیی بە زیاتر لە ۱۰۰ دەسەڵاتەوە بۆ دانا ئەحمەد مەجید کرد و سەرجەم دەسەڵاتەکانی خۆی بۆ بەڕێوەبردنی بزووتنەوەکە پێ سپارد، ئەو هەنگاوە بزووتنەوەى گۆڕانى کرد بە دووبەرەى دژ بەیەک کە یەکێکیان، زۆرینەى جڤاتى گشتین لە گردى زەرگەتە، ئەوى دیکەیان دانانى ئەحمەد مەجید، رێکخەرى گشتى و  زۆرینەى جڤاتى نیشتمانین.  

ڕۆژی ۲۸-۰۹-۲۰۲۴، بەشێک لە ئەندامانی جڤاتی نیشتمانی و هەڵسووڕاوانی بزووتنەوەی گۆڕان لە پارکی ئازادیی شاری سلێمانی، رێوڕەسمێکیان بۆ رێزلێنان و ماڵئاوایی لە عومەر سەیدعەلی، رێکخەری پێشووی بزووتنەوەی گۆڕان و دەستبەکاربوونی دانا ئەحمەد مەجید وەکو رێکخەری نوێی بزووتنەوەکە رێکخست.

بەڕێوەبردنی رێوڕەسمەکە لە پارکی ئازادی دوای ئەوە بوو، کوڕانی نەوشیروان مستەفا، رێکخەری کۆچکردووی بزووتنەوەکە بۆ رێگری لەو رێوڕەسمە رۆژی هەینی (۲۷-۰۹-۲۰۲۴) دەرگای مەکۆی سەرەکیی بزووتنەوەی گۆڕانیان بە بەربەستی کۆنکرێتی داخست، دەوام لە ژوور و دامەزراوەکانی بزووتنەوەکەش راگیرا.

دوای ئەو ناکۆکییانە، ۴ـی ۱۰ـی ۲۰۲۴، بزووتنەوەی گۆڕان و رێکخەرە نوێیەکەی بارەگایەکی نوێیان لە گەڕەکی کوردسات لە شاری سلێمانی کردەوە و رەتیانکردەوە، جارێکی دیکە بگەڕێنەوە گردی زەرگەتە.