بەپێی هەواڵی کوردپرێس، ئۆزگور ئۆزیل، سەرۆکی پارتی گەلی کۆماری(جەهەپە) لە سەكۆی (ئێكس) نووسیەتی لە ئێستادا هێزێک هەیە دەیەوێت رێگری بكات لەوەی میللەت سەرۆکی داهاتوو دیاری بکات. ئێمە لەبەردەم هەوڵی کوودەتایێکداین دژی سەرۆکی داهاتوومان... میللەتەکەمان دەوڵەتەکەی خۆشدەوێت، بەڵام ئەگەر دەوڵەت لەلایەن کەسێکەوە بۆ دژایەتی میللەت بەكاربهێنرێت، میللەت رێگەی پێنادات.
ناوبراو دەشڵێت هێزی ڕاستەقینە میللەتە و لە کۆتاییدا میللەت سەردەکەوێت... دیسان وەک خۆی دەبێتەوە. ئێمە تەسلیم نابین. لە کۆتاییدا ئیرادەی گەل سەردەکەوێت و تورکیا سەردەکەوێت.

شایانی باسە بەرەبەیانی دوێنێ ئاسایشی تورکیا چووە سەر ماڵی ئەکرەم ئیمامئۆغڵو، سەرۆکی گەورەشارەوانی ئیستەنبوڵ و دەستگیریکرد، بڕیاری دەستگیرکردنيش بۆ زیاتر لە ۱۰۰ کەسی دیکەش دەرچوو.
بەگوێرەی ئەو زانیارییانەی میدیای تورکیا بڵاویكردووەتەوە، پرۆسەكە لەسەر ژمارەیەک تەندەری پەیوەندیدار بە میدیایە و، داواکاری گشتی لە راپۆرتەکەیدا باسی گەندەڵی و هاوبەشی نێوان جەهەپە و پەکەکەی کردووە.