بەپێی هەواڵی کوردپرێس، بەرەبەیانیی ئەمڕۆ یەکشەممە ۲۳ـی ئاداری ۲۰۲۵ لە چوارچێوەی ئەو لێکۆڵینەوەیەدا کە بە تۆمەتی گەندەڵی لە دژی گەورەشارەوانیی ئیستەنبووڵ دەستیپێکردووە، ئەکرەم ئیمامئۆغڵو سەرۆکی گەرەشارەوانی ئیستەنبووڵ و ۹۹ کەسی دیکە کە لە ۱۹ـی ئەم مانگەوە دەستبەسەرکرابوون، رەوانەی دادگەی چاغڵایان کران و داوای زیندانیکردنیان کرا.

بە بڕیاری دادگە، ئەکرەم ئیمامئۆغلۆ و ۲۰ کەسی دیکە خرانە زیندانەوە و ۹ کەسیش بە مەرجی دادی ئازادکران. لێپرسینەوەی دادوەری لە گومانلێکراوەکانی دیکە بەردەوامە.

لەلایێکی دیکەوە بە تۆمەتی هاوکاری کردنی پەکەکە- کەجەکە لێکۆڵینەوە لە ۷  کەس بەردەوامە، لەوانە ئەکرەم ئیمامئۆغڵو، سەرۆکی گەورەشارەوانیی ئیستەنبووڵ، رەسوڵ ئەمرا شاهان سەرۆکی شارەوانیی شیشلی و ماهیر پۆلات، یاریدەدەری سکرتێری گشتیی گەورەشارەوانیی ئیستەنبووڵی لە نێودایە. 

بەرەبەیانی رۆژی چوارشەممە ۱۹ـی ئاداری ۲۰۲۵ لەسەر راسپاردەی داواکاری گشتیی ئیستەنبووڵ، ئیمامئۆغڵو لەلایەن هێزەکانی ئاسایشی ئیستەنبووڵەوە دەستگیرکرا.

یڵماز تونچ، وەزیری دادی تورکیا رۆژی ۱۹ـی ئاداری ۲۰۲۵ لە گوتارێکیدا لە ئەنقەرە رایگەیاند، لە چوارچێوەی ئەو لێکۆڵینەوانەی لەلایەن سەرۆکایەتیی داواکاری گشتیی ئیستەنبووڵەوە کراون، ئەکرەم ئیمامئۆغڵو بە تۆمەتی "هاوکاری کردنی رێکخراوی تیرۆریستی و گەندەڵیی دارایی" دەستگیر کراوە.