کوردپرێس: لە بەیاننامەیێکدا کە لەلایەن سەرۆکایەتی هەرێمەوە بڵاوکراوەتەوە، تێیدا هاتووە: "نێچیرڤان بارزانی لە دیدارەکەدا پاڵپشتی تەواوی خۆی بۆ سەرکەوتنی پڕۆسەی ئاشتی لە تورکیا دوپاتکردەوە، جەختی لەوە کردەوە کە ئەم پرۆسەیە نوێنەرایەتی دەرفەتێکی مێژووی گرنگە کە دەبێت کاری لەسەر بکرێت بۆ ئەوەی سەرکەوتوو بێت، بۆ بەهێزکردنی برایەتی نێوان کورد و تورکەکان، چونکە ئاشتی پێویستییەکە بۆ هەموو لایەک لە تورکیا و ناوچەکەدا".

هەروەها نێچیرڤان بارزانی ڕایگەیاندووە: "لە سەرەتاوە هەمیشە کارمان کردووە بۆ ئەوەی پرۆسەی ئاشتی ببێتە هەڵبژاردەیەکی ستراتیژی، و چارەسەری کێشەکان بەشێوەیەکی ئاشتیانە، چونکە ئەزموون سەلماندوویەتی کە شەڕ و چەک ناتوانێت هیچ کێشەیەک چارەسەر بکات".

هاوکات بارزانی هیوای خواست پارتی کرێکارانی کوردستان (پەکەکە) بە دیدگایەکی ستراتیژییەوە لە ئۆپەراسیۆنەکە نزیکبێتەوە و هۆشداریشی دا لە بەفیڕۆدانی ئەو دەرفەتە.

لای خۆیەوە وەفدی ئیمرالی سڵاو و پێزانینی تایبەتی عەبدوڵڵا ئۆجەلانیان گەیاندە نێچیرڤان بارزانی و ستایشی ئەو هەنگاوانەی کرد کە لە پرۆسەکەدا گیراونەتەبەر، هەروەها شاندەکە پێزانینی خۆی بۆ هەوڵەکانی نێچیرڤان بارزانی دەربڕی لە پاڵپشتیکردنی هەوڵەکانی ئاشتی، چ لە ڕابردوو و چ لە ئێستادا، داوای بەردەوامی ڕۆڵی ناوبراویان کرد لە پاڵپشتیکردن و سەرخستنی پرۆسەکە.

هەر ئەمڕۆ دوای کۆتاییهاتنی کۆبوونەوەکەی شاندی ئیمراڵی لەگەڵ نێچیرڤان بارزانی، هاوسەرۆکی پارتی هەرێمە دیموکراتییەکان کەسکین بەیندیر لە لێدوانێکی کورتی ڕۆژنامەوانیدا ڕایگەیاند: "کۆبوونەوەکە لەگەڵ نێچیرڤان بارزانی کۆبوونەوەیەکی زۆر بەرهەمدار بوو کە تێیدا سڵاوی عەبدوڵڵا ئۆجالان گەیاندرایە بارزانی، جگە لە گەیاندنی پەیامەکانی عەبدوڵڵا ئۆجالان سەبارەت بە پێویستی دۆزینەوەی چارەسەری سیاسی بۆ قەیرانی کورد، لە ڕێگەی یاساییەوە، کۆبوونەوەیەکی پڕ لە گەشبینی و کۆدەنگی بوو لەسەر گرنگی ئاشتی و چاکسازی سیاسی".

وتیشی: "پێمان وایە ئەگەر ئەم پرۆسەیە لە باکوری کوردستان و تورکیا بە سەرکەوتووی بەردەوام بێت، کاریگەری ئەرێنی دەبێت لەسەر ئایندەی گەلی کورد لە هەموو ناوچەکان، هیوایەکی زۆرمان هەیە کە ئەم هەوڵانە بەشدار بن لە گەیشتن بە چارەسەرێکی هەمەلایەنە بۆ قەیرانی کورد لە ناوچەکەدا کە ئەمەش ئەوەیە کە هەموو گەلی کورد ئاواتەخوازن".

بەیاندار ئەوەشی خستەڕوو، نێچیرڤان بارزانی پاڵپشتی تەواوەتی خۆی بۆ ئەم پرۆسەیە دووپاتکردەوە و پاڵپشتییەکی بەهێزی خۆی بۆ چارەسەرێکی سیاسی دەربڕیوە کە مافەکانی خەڵکی کوردستان زامن بکات.

دوێنێ یەکشەممە، شاندی ئیمرالی لەگەڵ سەرۆکی پارتی دیموکراتی کوردستان، مەسعوود بارزانی کۆبووەوە کە کۆبوونەوەکە نزیکەی کاتژمێرێک و ٤٥ خولەکی خایاند، بڕیارە شاندەکە لەگەڵ سەرۆکی یەکێتی پافڵ تاڵەبانی کۆ بێتەوە.

ئەم دیدارانە لە چوارچێوەی زنجیرەیێک سەردانی شاندی ئیمرالی، پەروین بوڵدان و سری سورەیا ئۆندەر، کەسکین بایندر، ئەندامانی کۆمیتەی پەیوەندییەکانی دەرەوە و بەرپرسانی پارتەکە، دوای کۆبوونەوەیان لەگەڵ عەبدوڵڵا ئۆجالان لە ٢٨ی کانوونی دووەمی ٢٠٢٤ و ٢٢ی ١ی ٢٠٢٥دا هاتوون.