بەپێی هەواڵی کوردپرێس، ئیدارەی خۆسەری باکوور و ڕۆژهەڵاتی سووریا له‌ ڕاگه‌یه‌ندراوێكدا باسی له‌وه ‌كردوه‌: هەر بڕیارێک لە دەرەوەی چوارچێوەی کۆنفرانسی نیشتمانی سووریا و بەبێ بەشداری هێزە سیاسی و شۆڕشگێڕی و جەماوەریەکان بە "ناتەواو و نایاسایی دادەنرێت و دیمەشق دەبێت هەڵەکە ڕاست بکاتەوە.

ئیداره‌ی خۆسه‌ر  ده‌شڵێت: "ئێمە ڕەخنە لەو جۆرە کۆبوونەوانە دەگرین، بەتایبەتی کاتێک کەسانێک لە لیستی تیرۆردان و دەستیان لە خوێنی گەلی سووریادایە، وەک ئەحمەد ئیحسان فەیاز هایس (ئەبوو حاتەم شەقرا)، ئەو تیرۆریستەی کە هەڤرین خەلەف، ئەمینداری گشتی حزبی سووریای ئایندەی کوشت، بەڵام له‌ كۆبوونه‌وه‌كه‌دا ئامادەبوو، هەروەها محەمەد جاسم کە بە (ئەبوو عەمشە) ناسراوە و چەندین تاوانی دژی گەلی سووریا ئەنجامداوە بەتایبەتی لە عەفرین".

ئه‌وه‌شی خستوه‌ته‌ڕوو‌: "ئەو بڕیارانەی کە لە دەرەوەی چوارچێوەی کۆنگرەی نەتەوەیی سووریا بەبێ بەشداریی هێزە سیاسی و شۆڕشگێڕەکان و خەڵک دەدرێن قبووڵ ناكرێن، بۆیه‌ بەستنی کۆنگرەی دیالۆگ لە سووریا بە بەشداریی پارتەکان یان قەوارەکانی سووریا، چارەسەری گونجاوە بۆ کۆتایی هێنان بە دۆخی ناسەقامگیری سووریا و ڕێگای گەیاندنی گەلەکەمانه‌، چوونکە وەدەرنانی حزبێک یان ڕێکخراوێک دەبێتە هۆی بەدینەهێنانی ئامانجەکانی شۆڕشی گەلەکەمان و دۆخێکی هاوشێوەی دەسەڵاتی پێشوو دروست دەکات".

ئیدارەی خۆسەری باکوور و ڕۆژهەڵاتی سووریا ڕوونی كردوه‌ته‌وه‌، "داوا لە حکوومەتی دیمەشق دەکەین لە هەڵەی ئێستا تێبگات و هەموو سوورییەکان بە هەموو دابەشبوون و مەیلی سیاسی خۆیانەوە لە کۆنگرەیەکی نیشتمانی گشتیدا کۆ بکاتەوە، پێویستە هەمووان بەشدار بن لە ئامادەکردنی کۆنگرە و نووسینی دەستووری نوێی وڵات".

هۆشداریش ده‌دات له‌وه‌ی كه‌ "حکوومەتی دیمەشق نابێت ڕێگە بە قسەی ڕقاوی و هەوڵدان بۆ لەناوبردنی ژیانی هاوبەشی نێوان خەڵکی سووریا بدات، زمانی دەستکاری کردن لە دژی نەتەوەیێک یان خێڵێک نەهێڵرێت، كه‌ لە هەندێک چالاکیی وەک ئەوەی چەند ڕۆژێک لەمەوبەر لە گۆڕەپانی ئومەوی لە دیمەشق و هەندێک شاری دیکە ڕووی دا دیار بوو، ئەو ڕه‌فتارانه‌ خزمەت بە ئامانجه‌كان ناکەن كه‌ هه‌مووان بۆ بنیاتنانی سووریایێکی دیموکراسی و یەکگرتوو هه‌وڵی بۆ ده‌ده‌ن".