بەپێی هەواڵی کوردپرێس، لاهوور شێخ جەنگی، لە ڕاگەیەندراوێكدا تۆڕی کۆمەڵایەتیی فەیسبووک ئاماژەی بەوەدا كە لە بەغدای پایتەخت، سەردانی نووری مالیکی، سەرۆک وەزیرانی پێشووتری عێراق و سەرۆکی هاوپەیمانی دەوڵەتی یاسای کردووە.

شێخ جەنگی وتوشیەتی: "لەو سەردانەدا چەند تەوەرێکی گرنگمان تاوتوێ کرد، لە سەروی هەموویانەوە پرسی کێشەی مووچەخۆرانی هەرێم و دواکەوتنی مووچەکانیان، هەردوولا جەختمان کردەوە کە نابێت قووتی خەڵک بە هۆکاری گەندەڵی و یاساشکێنی کێشەی بۆ دروست بکرێت و ئەو کێشەیەی زیاتر لە 10 ساڵە بەرۆکی خەڵکی کوردستانی گرتووە دەبێ بە ڕیشەیی چارەسەربکرێ، ئەوەش بە شەفافیەت و یاساسەروەری دەکرێت."

سەرۆكی بەرەی گەل وتووشیەتی: "دۆخی ئەمنی عێراق و ناوچەکە و ئەو پەرەسەندنانەی هاتوونەتە ئاراوە لە ئاستی هەرێمایەتی تەوەرێکی تری گفتوگۆکانی نێوان ئێمە و جەنابی مالیکی بوو."

هێمای بۆ ئەوەش كردوە: "هەروەها بە بایەخەوە باسمان لە هەڵبژاردنەکانی ساڵی ئایندەی ئەنجومەنی نوێنەرانی عێراق کرد و کۆک بووین لەسەر هەماهەنگی و لێکتێگەیشتنی زیاتر لە نێوانماندا".