بەپێی هەواڵی کوردپرێس، ڕوانگەی سووری بۆ مافەکانی مرۆڤ لە ڕاگەیەندراوێکدا بڵاویکردەوە، فڕۆکەیەکی بارهەڵگری سەربازی هێزەکانی هاوپەیمانی نێودەوڵەتی ڕۆژی سێشەممە گەیشتوەتە بنکەی قەسرەک لە لادێکانی حەسەکە و کەرەستەی سەربازی و لۆجستی تێدابووە، هاوکات فڕۆکەیەکی دیکەش لە بنکەی شەدادی نیشتوەتەوە و بەهەمانشێوە کەرەستەی سەبازی تێدابووە و دوو هێلیکۆپتەریش چاودێریان کردووە.

ئاماژەی بەوەش کردووە، بەهێزکردنی پێگە سەربازییەکان دوای ئەوە هات کە هێزێکی زەمینی هاوپەیمانی نێودەوڵەتی کە پێکهاتبوون لە چەند بارهەڵگرێکی کەرەستەی سەربازی و لۆجستی، بەرەو بنکەیەکی ئەمریکییەکان لە لادێکانی حەسەکە بەڕێکەوتن.

ڕوانگەی سووری بۆ مافەکانی مرۆڤ باسی لەوەش کردووە، بەهێزکردنی بنکە سەربازییەکان لە ناوچەکەدا هاوکاتە لەگەڵ بەردەوامی ململانێ و ئاڵۆزییەکان لە ڕۆژهەڵاتی ناوەڕاست.

ئەوە لە کاتێکدایە هاوپەیمانی نێودەوڵەتی هێزی زیاتریان بردوەتە بنکەی کۆنیکۆ لە باکووری دێرەزور، جگە لەوەی چوار تۆپهاوێژ و چەکی پێشکەوتوو و چەند ئۆتۆمبێلێکی سەربازی نوێیان بردوەتە بنکەکە، ئەوەش وەک هەنگاوێک بۆ بەهێزکردنی بوونی سەربازی هاوپەیمانان لە ناوچەکەدا.