بەپێی هەواڵی کوردپرێس، سەعدی پیرە، وتەبێژی یەکێتی، بە دەنگی ئەمریکای ڕاگەیاندووە: "ئەو هێرشانەی دەکرێتە سەر هەرێمی کوردستان، ئەو هەڕەشانەی کە هەن؛ چی بۆردوومانەکانی هەولێر، چی مەتاری عەربەت، چی هێرشە درۆنیەکان، هەوڵی کەم‌کردنەوەی ستافی دامەزراوە نێودەوڵەتیەکان و کۆتایی‌هێنان بە مانەوەی تیمی ڕاهێنەری هێزەکانی هاوپەیمانان هەمووی بە یەکەوە هەوڵێکە ئامانج لێی بچووک‌کردنەوەی قەوارەی هەرێمی کوردستان و هەڕەشەن لەسەر هەرێم."

ناوبراو وتیشی: "ئیتر دەبێت ئێمەش هەموو هەوڵە سیاسی و دیپلۆماسیەکان بخەینە گەڕ بۆ بە گژداچوونەوەی ئەم هەوڵ و تەقەللا نەزۆکانە وە هەوڵوێستی یەکگرتومان هەبێت."

لە دوای هێرشەکەی ۱۵ی ئەم مانگەی ئێران بۆسەر هەولێر و بەردەوامی هێرشە درۆنیەکان بۆسەر هێزەکانی هاوپەیمانان، شەوی ۲۶ی مانگی ۱یش هێرش کرایە سەر کێڵگەی گازی کۆرۆمۆر لە سنووری چەمچەماڵ و هێرشەکەش ڕاستەوخۆ بە هێرش بۆسەر کەرتی کارەبا و وزەی هەرێم لێکدرایەوە.

لەمبارەوە وتەبێژی یەکێتی دەڵێت: "هەر لایەنێکی سیاسی لە هەرێم پێی وابێت جیاوازی شارێک و شارێک هەیە، بۆ نموونە پارتی پێی وابێت سلێمانی پەیوەندی بە ئەوەوە نییە و حکوومەت حەقی نییە، وە یەکێتی پێی وابیت هەولێر پەیوەندی بە ئەوەوە نییە ئەمە هەم خۆ بچووکردنەوەیە و هەم قەوارەی هەرێمیش بچووک دەبێتەوە".

سەعدی پیرە وتیشی: "دەبێت ئەوە بزانین هەموو لایەکمان بەرپرسین و بەیەکەوە دەبێت بەرگری لە قەوارەکە بکەین و داوا لە دۆستەکانیشمان بکەین لە هەرکوێ بن هاوکاریمان بکەن".

ناکۆکی نێوان لایەنە سیاسیەکان، گەشتۆتە ئاستی تۆمەتبارکردنی یەکتری، بەشیک لە چاودێران و هاوڵاتیانی هەرێمی کوردستان یەکێتی و پارتی بە دابەشبوون بەسەر سیاسەتی ناوچەیی تۆمەتبار دەکەن، دوێنێش مەسروور بارزانی سەرۆکی حکوومەتی هەرێمی کورستان، لە بەیاننامەیەکدا هێڕشی کردە سەر "خائین و خۆفرۆشان و کۆیلەی ناحەزان "بە بێ ئەوەی ناوی هیچ لایەنێکی دیاریکراو بهێنێت.

سەعدی پیرە، پێی وایە لە هەرێمی کوردستان سیستەمی سیاسی فرەیی هەیە و دەبێت ڕێز لەو فرەیی و کاری پێکەوەیی بگیرێت.

سەعدی پیرە وتیشی: "ئێمە هەموو هێزی جیاجیاین هەموومان هەوڵ دەدەین سیستەمێکی پەرلەمانی فرەحزبی فیدرال پیادە بکەین، لە هەرێم لە چوارچێوەی عێراق کە باسی فرەیی دەکەین واتە فرە حزبی واتە بەرنامەی سیاسی و ئابووری و کەلتوری جیا جیا و هەر کەس بەرنامەی خۆی هەیە، هەر کەس کێ بڕکێیەتی لەسەر زۆرترین دەنگ و کورسی و هەبوونی زۆرترین دەسەڵات".

ناوبراو وتیشی،" ئەگەر یەکتری تۆمەتبار بکەین بە ناپاک و خائین پێم وایە خۆمان بچووک دەکەینەوە، بەم نەفەسە کورتە ناتوانین باسی فرە حزبی بکەین، فرەیی ئەو کاتە واتای هەیە کە مەجالێکمان بۆ کاریی فرەیی و یەکتر قبووڵکردن هێشتەوە بۆ یەکتر".