بەپێی هەواڵی کوردپرێس، بافڵ تاڵەبانی، سەرۆکی یەکێتیی نیشتمانیی کوردستان بە سەرۆکایەتی  شاندێکی باڵای یەکێتی سەردانی کۆمەڵی دادگەریی کوردستانی کرد و لەلایەن عەلی باپیر، سەرۆکی کۆمەڵی دادگەری و شاندێکی باڵای کۆمەڵی دادگەرییەوە پێشوازی لێکرا.

لەبارەی کۆبوونەوەی نێوانیان، هەردوولا ڕاگەیەندراوێکی هاوبەشیان بڵاوکردەوە، تێیدا هاتووە: "لە کۆبوونەوەیەکدا گفتوگۆ دەربارەی بارودۆخی سیاسی هەرێم و عێراق و ناوچەکە کرا و جەختیش کرایەوە لە پێویستیی پاراستنی بەرژەوەندییە باڵاکانی خاک و خەڵکی کوردستان، هەموو لایەنەکانیش پێکەوە هەوڵەکانیان بخەنەگەڕ بۆ چارەسەرکردنی ریشەیی بژێوی هاووڵاتییان بەگشتی و مووچەخۆران بەتایبەتی".

ئاماژە بەوەش کراوە، "بە پەرۆشەوە جەختیان کردەوە لە درێژەدان بە گفتوگۆ و دیالۆگی نیشتمانیی لە هەرێم بە شێوەیەک لەبەرامبەر پرسە چارەنووسسازەکان کۆدەنگی نیشتمانیی دروست بکرێت و یەک گوتاری نیشتمانیی ئاڕاستەی بەغدا بکرێت کە سەرچاوەکەی دیدگای باڵای کوردستانی بێت کە بۆئەوەش یەکخستنی هەوڵەکان و لابردنی بەربەستەکانی بەردەم پەیوەندی لایەنە سیاسیەکانی هەرێم بە پێویست زانرا."

هەر بەگوێرەی ڕاگەیەندراوە هاوبەشەکە، دۆخی نەخوازراوی ناوچەکە، پرسی هەڵبژاردن دوو تەوەری تری کۆبوونەوەکە بوون "کە بە وردی تاوتوێ کران و دووپات لە پاراستنی سەقامگیری ئاسایش و ئارامی هەرێم، لابردنی ئاستەنگەکانی بەردەم هەڵبژاردن کرایەوە بە شێوەیەک هەموو هەوڵەکان بخرێنە گەڕ تا هەڵبژاردنێکی پاک و بێگەرد کە وەڵامدەرەوەی خواستی هەمووان بێت لە کاتی خۆیدا بەڕێوەبچێت".