بەپێی هەواڵی کوردپرێس، محەمەد ئۆجەلان (برای عەبدوڵڵا ئۆجەلان) و عومەر ئۆجەلان (برازای عەبدوڵڵا ئۆجەلان و پەرلەمانتاری دەم پارتی لە بازنەی رووها) بە بۆنەی جەژنی ڕەمەزان، بۆ دیداری عەبدوڵڵا ئۆجەلان، ڕێبەری زیندانیکراوی پەکەکە، سەردانی گرتووخانەی سزا قورسەکانی دوورگەی ئیمراڵییان کرد.

عومەر ئۆجەلان، لە هەژماری تایبەتی خۆی لە تۆڕی کۆمەڵایەتیی ئێکس پەیامی نوێی عەبدوڵڵا ئۆجەلانی بڵاوکردەوە و رایگەیاند، لە کاتێکدا پێشهاتی گرنگ لە تورکیا، رۆژهەڵاتی نێوەڕاست و جیهان دەگوزەرێن، پەیامی عەبدوڵڵا ئۆجەلان بۆ رای گشتیی بڵاو دەکەمەوە.

عومەر ئۆجەلان نووسیویەتی، پەیامەکەی بەڕێز ئۆجەلان بەمشێوەیە بوو: "سڵاو بۆ ئەو جۆش و خرۆشە مەزنەی گەلەکەمان کە لە نەورۆزدا بەدەم بانگەوازمان بۆ ئاشتی و دیموکراسیەتی کۆمەڵگەوە چوون و خاوەندارییان کرد. دووبارە جەژنی نەورۆز و جەژنی رەمەزانتان پیرۆز دەکەم".

محەممەد ئۆجەلان و عومەر ئۆجەلان لە دوورگەی ئیمراڵی بۆ کاتژمێرێک دیداریان لەگەڵ عەبدوڵڵا ئۆجەلان ئەنجامدا.