بەپێی هەواڵی کوردپرێس، ئەمڕۆ ٢٣ی ٣ی ٢٠٢٥، جەهەپە لە کۆنگرەی نائاسایی خۆیدا، بەفەرمی و بە دەنگی ئەندامانی کۆنگرە، ئیمامئۆغڵوی کردە بەربژێر بۆ هەڵبژاردنی داهاتووی سەرۆکایەتیی لە تورکیا.
ئەم بەربژێرییەی ئیمامئۆغڵو لە کاتێکدایە، ئیمامئۆغڵو بە تۆمەتی ئەوەی پشتگیری لە پەکەکە کردووە و هەروەها گەندەڵی لە شارەوانیی ئیستانبۆڵدا کردووە، خراوەتە زیندان.
رۆژێک بەر لەوەی ئیمامئۆغڵو دەستگیر بکرێت، دادگا بڕوانامەی ناوبراوی هەڵوەشاندەوە، بە هۆکاری ئەوەی بە ساختە توانیویەتی بچێتە زانکۆ و بەشی ئینگلیزی تەواو بکات.
بەگوێرەی دەستووری تورکیا بێت، هەر کەسێک بیەوێت ببێتە سەرکۆماری تورکیا، دەبێت بڕوانامەکەی لە بەکالۆریۆس کەمتر نەبێت، هەڵوەشانەوەی بڕوانامەی ئیمامئۆغڵو لەلایەن دادگاوە رێگەی لێدەگرێت ببێتە بەربژێری هەڵبژاردنی سەرۆکایەتیی.
ئەم هەوڵەی جەهەپە و بەربژێرکردنی ئیمامئۆغڵو بۆ ئەوەیە، بە دادگا و پارتی دەسەڵات (ئاکەپە) بڵێن، ئەوان بڕیاری دادگایان قبووڵ نییە و ئەوەی بەرامبەر بە ئیمامئۆغڵو کراوە سیاسییە نەک یاسایی، بۆیە داکۆکی دەکەن کە بەربژێری ئەوان تەنیا ئیمامئۆغڵووە.
Your Comment