بەپێی هەواڵی کوردپرێس، لۆید ئۆستن، وەزیری بەرگریی ئەمریکا لە هەڤپەیڤینێکدا لەگەڵ ئاژانسی ئەسیۆشەیتد پرێس (AP) ڕایگەیاند، هێشتا هێزەکانی ئەمریکا لە سووریا پێویستن، بەتایبەتی بۆ دڵنیابوون لە پاراستنی ئاسایشی کەمپەکانی کوردستانی سووریا و باکووری ڕۆژهەڵاتی سووریا، کە بە هەزاران چەکدای پێشووی داعش تێیاندا دەستبەسەرن. 
لەبارەی داهاتووی هێزەکانی ئەمریکا لە سووریا، ئۆستن لە قسەکانیدا گوتی، "ئەگەر سووریا نەپارێزرێت، پێموایە چەکدارانی داعش، دەگەڕێنەوە. پێشموایە هێشتا ئێمە هەندێک کارمان ماوە، تاوەکوو بتوانین فشارەکانمان لەسەر داعش بمێنێت".
وەزیری بەرگریی ئەمریکا دەشڵێت "هەسەدە هاوبەشێکی باشمان بووە، بەڵام لە خاڵێکدا ڕەنگە هەسەدە تێکەڵی سوپای سووریا بکرێت و دواتریش سووریا کۆنترۆڵی سەرجەم کەمپەکان دەکات و هیوادارین بتوانێت بیانپارێزێت. بەڵام بۆ ئێستا پێموایە دەبێت ئێمە پارێزگاری لە بەرژەوەندییەکانمان بکەین".