بەپێی هەواڵی کوردپرێس، به‌گوێره‌ی ڕاگه‌یه‌ندراوێکی ناوه‌ندی ڕاگه‌یاندنی هێزەکانی سووریای دیموکرات، به‌ ئاماده‌بوونی به‌رپرسانی هاوپه‌یمانی نێوده‌وڵه‌تی، کۆبوونه‌وه‌یه‌ک له‌ نێوان مه‌زڵووم عه‌بدی فه‌رمانده‌ی هێزه‌کانی سووریای دیموکرات و شاندێکی باڵای ئه‌نجومه‌نی نیشتمانیی کورد له‌ سووریا (ENKS‌) به‌ڕێوه‌چوو.

ناوه‌ندی ڕاگه‌یاندنی SDF ئاماژه‌ی به‌وه‌ش کردووه‌، کۆبوونه‌وه‌که‌ به‌مه‌به‌ستی تاوتوێ کردنی بنیاتنانی پێگه‌یه‌کی یه‌کگرتووی کورد له‌ سووریای نوێ بوو، که‌ تیایدا له‌سه‌ر گرنگیی به‌رده‌وامبوونی کۆبوونه‌وه‌کان و خێراکردنی چاره‌سه‌رکردنی پرسه‌ مشتومڕاوییه‌کان ڕێککه‌وتن کرا.

له‌دوای ڕووخانی ڕژێمی به‌شار ئه‌سه‌د، به‌یه‌که‌م کۆبوونه‌وه‌ی کورد داده‌نرێت به‌مه‌به‌ستی تاوتوێکردنی داهاتووی سووریا و پێگه‌ی کورد له‌و وڵاته‌.