بەپێی هەواڵی کوردپرێس، به‌گوێره‌ی ڕاگه‌یه‌ندراوێکی نووسینگه‌ی سه‌رۆکی یه‌کێتی، بافڵ تاڵه‌بانی سه‌رۆکی یه‌کێتیی نیشتمانیی کوردستان له ده‌باشان پێشوازیی له محه‌مه‌د شیاع سودانی سه‌رۆک وه‌زیرانی عێراق کرد.
له‌دیدارێکدا گۆڕانکارییه سیاسی، ئابوری و ئه‌منییه‌کان تاوتوێکران، جه‌خت له به‌رده‌وامیی هه‌ماهه‌نگی و هاریکاریی نێوان لایه‌نه‌کانی هه‌رێم و عێراق بۆ چاره‌سه‌رکردنی کێشه‌کان له‌سه‌ر بنه‌مای ده‌ستور، هاوبه‌شیی راسته‌قینه و رێککه‌وتنه سیاسییه‌کان کرایه‌وه له‌پێناو چاره‌سه‌رکردنی کێشه‌کان به‌تایبه‌ت پرسی موچه و جێبه‌جێکردنی بڕیاره‌کانی دادگای فیدڕاڵی له‌وباره‌یه‌وه.
له‌درێژه‌ی دیداره‌که‌دا سه‌باره‌ت به پێکهێنانی حکومه‌تی نوێی هه‌رێمی کوردستان، هه‌ردولا جه‌ختیان له پێویستیی په‌له‌کردن له پێکهێنانی حکومه‌تێکی خزمه‌تگوزار کرده‌وه که پره‌نسیپی راسته‌قینه و هاوبه‌شیی تێدا په‌یڕه‌و بکرێت، ببێته مایه‌ی سه‌قامگیری و وه‌ڵامده‌ره‌وه‌ی خواستی هه‌مولایه‌ک بێت، له‌و روه‌شه‌وه بافڵ جه‌لال تاڵه‌بانی رایگه‌یاند، "یه‌کێتی په‌رۆشی پێکهێنانی حکومه‌تێکی دادپه‌روه‌ر و دور له جیاکارییه له‌پێشکه‌شکردنی خزمه‌تگوزاریدا، ده‌مانه‌وێت هاوبه‌شی راسته‌قینه بین له به‌ڕێوه‌بردنی هه‌رێمه‌که‌مان و هه‌موان به رۆحێکی به‌رپرسیارانه‌وه کار بۆ خزمه‌تی خه‌ڵکه‌که‌مان و به‌هێزترکردنی هه‌رێمه‌که‌مان بکه‌ین".
له‌به‌شێکیتری دیداره‌که‌دا پرسی سه‌رژمێری و راپه‌ڕاندنی ئه‌رکه نیشتمانی و چاره‌نوسسازه‌کان گفتوگۆیان له‌باره‌وه‌کرا و گرنگی دیدی هاوبه‌ش بۆ سه‌رجه‌م پرسه‌کان و به‌رده‌وامیی دیالۆگ و راوێژی نیشتمانیی نێوان لایه‌نه‌کان جه‌ختی له‌سه‌رکرایه‌وه له‌پێناو پاراستنی ئارامی و زاڵبون به‌سه‌ر ئاڵنگارییه‌کاندا.
Your Comment