بەپێی هەواڵی کوردپرێس، هۆمەری شێخموس، ئەندامی دەستەی دامەزراندی یەکێتی نیشتمانیی کوردستان لە پەیامێکدا کە ئاراستەى مەسعوود بارزانى و بافڵ تاڵەبانى و نێچیرڤان بارزانى و مەسروور بارزانى و قوباد تاڵەبانى کردووە دەڵێت: چاوی هەموو جیهان ڕووی لە ئێمەیە بۆ ئامادەکردن و بەڕێوەبردنی هەڵبژاردنێکی پاک، بێ گەرد، تکاتان لێ دەکەم، هیوا و ئومێدی ڕای گشتی جیهان بە میللەتی ئێمە بە فیڕۆ و عەبس مەبەن، وەک گەلی چەوساوەی فەلەستین بە سەر میللەتی ئێمەدا مەهێنن  و دووچاری نەهامەتی زیاتری مەکەن.

دەقى پەیامەکە:

بانگەواز بۆ :

بەڕێز مەسعوود بەرزانی سەرۆکی پارتی دیموکراتی کوردستان

بەڕێز نێچیرڤان بەرزانی سەرۆکی هەرێمی کوردستان، جێگری سەرۆکی پارتی دیموکراتی کوردستان

بەڕێز بافل جەلال تاڵەبانی سەرۆکی یەکێتی نیشتمانیی کوردستان

بەڕێز مەسروور بەرزانی سەرۆکوەزیرانی حکوومەتی هەرێمی کوردستان

بەڕێز قوباد تاڵەبانی جێگری سەرۆکوەزیرانی حکوومەتی هەرێمی کوردستان

بەڕێزان ئەندامانی مەکتەبی سیاسی و ئەنجومەنی سەرکردایەتی هەردوو پارتی دیموکراتی کوردستان و یەکێتی نیشتمانی کوردستان.

وێڕای سڵاوی گەرمی برایانە، داوای خۆشی و سەرکەوتنتان بۆ دەکەم.

برایانی بەڕیز!

چاوی هەموو جیهان ڕووی لە ئێمەیە بۆ ئامادەکردن و بەڕێوەبردنی هەڵبژاردنێکی پاک، بێ گەرد، ڕەوا و ئازاد لە کوردستان.

تکاتان لێ دەکەم، وە دیسان هەزاران جاری‌تر تکاتان لێ دەکەم کە هیوا و ئومێدی ڕای گشتی جیهان بە میللەتی ئێمە بە فیڕۆ و عەبس مەبەن، وەک گەلی چەوساوەی فەلەستین بە سەر میللەتی ئێمەدا مەهێنن  و دووچاری نەهامەتی زیاتری مەکەن.

تکاتان لێ دەکەم لە هیچ و خۆڕایی دەستکەوتەکانی گەلی کوردستان، کە بە نرخێکی ئێجگار زۆر گران بە دەست هاتوون، مەخەنە مەترسییەوە و دووچاری لە ناوبردنی مەکەن.

شاڵاوی هەڵبژاردن بەم شێویە ناکرێت. ئەم جۆرە وتارانە و ئەم چەشنە کارانە زەمینە سازکەرە بۆ شەڕی ناوخۆ، شەڕی خۆکوشتن و یەکتر کوشتن.

تکایە، بگەڕێنەوە سەر شاڕێگای ڕاستەقینەی دیموکراسی و ئازادی بیروڕا و پێکەوە بوون.

دروستکردنی سینارێوی جۆراوجۆر لە دژی یەکتر و بۆ ناوزڕاندنی یەکتر بە قەزانجی هیچ لایەنێک تەواو نابێت، بەڵکوو لە ئەنجامدا بە زیان و زەرەر بۆ ناو و ناوبانگ و پێگەی گەلی کوردستان لە هەموو جیهان تەواو دەبێت.

پێویستە هەمیشە ئەوە بسەلمێندرێت کە بەکارهێنانی  زەبروزەنگ و هێزی چەکداریش هیچ گرفتێک چارەسەرناکات. ئازادی ڕادەربڕین، ئاواڵە بوونی درگای دەزگای ڕۆشنبیری و ڕاگەیاندن و ڕۆژنامەگەری سەربەخۆ دەبێ لە کوردستان ڕێگا پێدراوبێت.

هەمیشە تەنها ڕێگا، ڕێگای دیالۆگی دیموکراتی و ئاشتیانەیە بۆ چارەسەرکردنی سەرجەم کێشەکان. ئێوە کە لەگەڵ دەوڵەتانی جۆراوجۆر دانوستاندن دەکەن و دەگەنە ڕێککەوتن، چەند باش دەبوو پێکەوە و بەرامبەر بە یەکتریش نەرمی بنوێنن و بە کردەوە و بە سینگفراوانییەوە بەرژەوەندی گەلی کورد بخەنە پێش بەرژەوەندی حیزب و تاکەکەسەوە.

تکایە، ڕەوشی کوردستان ئارام بکەنەوە و شەڕی ڕاگەیاندنی ناڕەوا ڕاگرن، بۆ بەڕیوەبرەدنی هەڵمەتی هەڵبژاردن بە شێوەیەکی شارستانیانە، پاک، ڕەوا و ئازادانە.

خەڵکی کوردستان بە گشتی زۆر ماندوو و نیگەرانە لەو هەوموو ناکۆکییە بێ مانایانە کە هێزە سیاسیەکان بۆیان دروست دەکەن. کاتی ئەوە هاتووە کە ڕێز لە خەبات و تێکۆشانیان بگرین و ژیانێکی ئاسودە، ئارام و خۆشگوزەرانیان بۆ دابین بکەین.

بەرەو پێشەوە بۆ هەڵبژاردنێکی سەرکەوتوو بۆ پەرلەمانی کوردستان.

لەگەل ڕێزم بۆ هەموو لایەک،

هۆمەری شێخموس

 ئەندامی دەستەی دامەزراندی یەکێتی نیشتمانی کوردستان.