بەپێی هەواڵی کوردپرێس، نێچیرڤان بارزانی له په‌یامێکدا به‌بۆنه‌ی یادی ۷۸ ساڵه‌ی دامه‌زراندنی پارتی دیموکراتی کوردستانه‌وه، وێڕای پیرۆزبایی له ئه‌ندام و لایه‌نگرانی خزبه‌که‌ی ڕایگه‌یاندووه، له‌م یاده پیرۆزه‌دا داکۆکی له به‌ها و بنه‌ما نه‌گۆڕه‌کان و ئه‌و ئامانجه نه‌ته‌وه‌یی و نیشتمانییه باڵایانه ده‌که‌ینه‌وه که پارتی له پێناویاندا دامه‌زرا و ڕابه‌رایه‌تیی بزووتنه‌وه‌ی ڕزگاریخوازی کوردستانی کرد، مایه‌ی شانازییه‌کی گه‌وره‌یه که له ڕۆژی دامه‌زراندییه‌وه، پارتی پێشه‌نگیی بزووتنه‌وه‌ی کوردایه‌تییه بۆ گه‌یشتن به ئازادی و سه‌رفرازیی کوردستان و تا سه‌رکه‌وتنی یه‌کجاری به بڕواوه به‌رده‌وام ده‌بێت.
ناوبراو ئاماژه‌ی به‌وه‌ش کردووه، "له کاتێکدا یادی پیرۆزی ۱۶ی ئاب ده‌که‌ینه‌وه که هه‌رێمی کوردستان و عێراق و ناوچه‌که له‌به‌رده‌م پێشهات و ئاڵنگاریی گه‌وره‌دان، پارتی چۆن له خه‌بات و شۆڕش و ده‌سکه‌وته‌کانی گه‌لی کوردستاندا، ڕۆڵ و ئه‌رک و به‌رپرسیاریه‌تیی سه‌ره‌کی هه‌یه، ئێستا و بۆ هه‌میشه پێشه‌نگی پته‌وکردنی ته‌بایی و یه‌کڕیزی و پێکه‌وه‌یی و پاراستنی پێکه‌وه‌ژیان و یه‌کتر قبووڵ کردن و لێبوورده‌یی و مافه ده‌ستورییه‌کانی گه‌لی کوردستانه و به هه‌موو هێز و توانایه‌وه له‌م پێناوه‌دا ده‌سپێشخه‌ر و به‌رده‌وام ده‌بێت".
نێچیرڤان بارزانی ده‌شڵێت، "پارتی هه‌میشه شانازی به مێژوی تێکۆشان و قوربانی و ده‌سکه‌وته‌‌کانییه‌وه ده‌کات و به بڕوا و متمانه‌ی گه‌لی کوردستان، به هیوا و ئومێده‌وه بۆ داهاتویه‌کی گه‌شتر کار ده‌کات".
سەرۆکی هەرێمی کوردستان ئاماژه‌ی به‌وه‌ش کردووه، "پێویسته هه‌میشه خۆی له‌گه‌ڵ پێشکه‌و‌تنه‌کانی سه‌رده‌م له هه‌موو بواره‌کاندا نوێ بکاته‌وه و بره‌و به ئه‌زموونی حوکمڕانی و به‌هێزکردنی دامه‌زراوه‌کان و گیانی نیشتمانی و سووربوون له‌سه‌ر تێکۆشان بدات تا ئازادی و سه‌رفرازی و هه‌موو مافه‌کانی گه‌لی کوردستان مسۆگه‌ر ده‌کات".
Your Comment