بەپێی هەواڵی کوردپرێس، لە ڕاگەیێندراوەکەدا ئاماژی بەوە کراوە، هەندێک کەس بە سووتاندنی نووسینگەی ئەنجومەنی نیشتمانیی کورد- سووریا، کردەوەیەکی تێکدەرانەیان لە شاری کۆبانێ ئەنجامداوە، هەروەها ئەم کارە لە شاری عامودێش بە هەمان شێوە ڕوویداوە.

ئەوەش خراوەتەڕوو هێزەکانی ئاسایش دەستیانکردووە بە لێکۆڵینەوەی بەرفراوان بۆ گەیشتن بە ئاشكراكردنی تاوانباران. جەخت لەوەش كراوەتەوە بەردەوام دەبن لە لێکۆڵینەوەکان بۆ ئاشکراکردنی ئەنجامدەرانی ئەو دوو ڕووداوە و دادگاییکردنی تاوانباران.

شایانی باسە ئەنجوومەنی نیشتیمانیی کورد لە سووریا (ENKS) هاوپەیمانێتییەكە لە ۱۷ پارتی کوردی سووریا و ۱۱ كۆمەڵە و رێكخراو پێكهاتووە، ئەمە جگە لە کەسایەتییە سەربەخۆکانی وەک ڕۆشنبیران، سیاسەتمەداران و هونەرمەندان.