بەپێی هەواڵی کوردپرێس، لە نووسراوەکەدا کە سروە عەبدولواحید، سەرۆکی فراکسیۆنی نەوەی نوێ بڵاوی‌کردووەتەوە باسی دۆخی قورسی بژێویی فەرمانبەرانی کوردستان و چەند مانگ وەرنەگرتنی مووچەکانیان کراوە، تێیدا هاتووە: "بفەرموون فەرمان بدەن بە لایەنە پەیوەندیدارەکان بەتایبەت ئەو دوو وەزارەتە بۆ ئەوەی بابەتی کێشەی مووچەی فەرمانبەرانی کوردستان بەپێی ڕەزامەندیی سەرۆک‌وەزیران وەکوو ئەوەی لە نووسراوی ژمارە  (۳۰۰۲/۲۳۳۳۴۲۶) لە ۱۵ـی تشرینی دووەمی ۲۰۲۳ هاتووە، چارەسەربکرێت.

نووسراوەکە جەخت لە نووسراوێکی پێشتر دەکاتەوە کە تێیدا داواکرابوو هەمان مامەڵەی فەرمانبەرانی حکوومەتی ناوەندی لەگەڵ فەرمانبەرانی هەرێمی کوردستان بکرێت و مووچەکانیان لە رێگەی بانکەوە و مانگانە بدرێت.

ئەو پەرلەمانتارانەی واژۆیان لەسەر داواکارییەکە  کردووە بەشێکیان تێبینییان نووسیوە لەوانە: "فەرمانبەران پەیوەندییان بە ناکۆکیی سیاسییەوە نییە. بەڵێ بۆ دادپەروەری‌کردن لەگەڵ فەرمانبەرانی هەرێمی کوردستان".