بەپێی هەواڵی کوردپرێس، چۆمان محەمەد وتەبێژی کۆنفرانسەکە بە میدیای گۆڕانی وت، لە کۆنفرانسەکەدا دەمانەوێت بۆ شێوازی سیاسەت‌کردن بچینە قۆناغێکی نوێوە و هەڵسەنگاندن بۆ بڕیارەکانی جڤاتی نیشتمانی و ڕابردووی نوێنەرەکانی بزووتنەوەی گۆڕان بکەین.

ناوبراو دەشڵێت، ئامانجیانە لەو کۆنفڕانسەدا بگەن بەو وەڵامەی ئایا بەرنامە سیاسییەکەیان پێویستی بە گۆڕانکارییە یاخود نا، بە هەموو ئیرادەیانەوە هەوڵدەدەن بۆ تێپەڕاندنی ئەو گرەو و ئاڵەنگارییانەی لەسەر بزووتنەوەی گۆڕان دەکرێن.

بەپێى دەستورى رێکخراوەیى بزووتنەوەى گۆڕان، ئەرکەکانى کۆنفڕانسى نیشتمانى خۆى دەبینێتەوە لە نوێکردنەوەى بەرنامەى سیاسى لەبوارە جیاوازەکاندا، پێداچونەوە بە دەستورى رێکخراوەیى، هەڵسەنگاندن و دەستکاریکردنى پلاتفۆرمەکانى هەڵبژاردنەکانى پارێزگا وهەرێم و عێراقى فیدراڵ، هاوکات هەڵسەنگاندنى ئەداى تیمەکانى بزووتنەوەى گۆڕان لە حکومەت و نوێنەرەکانى لە دەزگا هەڵبژێردراوەکانى؛ پارێزگا، هەرێم و عێراقى فیدراڵ، هاوکات هەڵسەنگاندنى ئەداى جڤاتى نیشتمانى لە چەند ساڵى رابردودا.

کۆنفرانسەکەی گۆڕان پڕۆسەى سەرلەنوێ خۆڕیکخستنەوە و خۆنوێکردنەوەى بزووتنەوەکەیە بەتایبەت دواى ئەنجامى هەڵبژاردنى ئەنجومەنى نوێنەرانى عێراق لە ئۆکتۆبەری 2021 کە بزووتنەوەى گۆڕان شکستی هێنا و هیچ کورسییەکی نەبردەوە.