بەپێی هەواڵی کوردپرێس، یەکشەممەی رابردوو، لە ئەنقەرەی پایتەختی تورکیا تەقینەوەیەک ڕوویدا، دواتر پارتی کرێکارانی کوردستان بەرپرسیارێتی خۆی لەو تەقینەوەیە راگەیاند، دوێنێیش هاکان فیدان، وەزیری دەرەوەی تورکیا رایگەیاند: کە "ئەنجامدەرانی هێرشەکە لە سووریاوە هاتووە"، مەبەستیشی بە دیاریکراویی کوردستانی سووریا بوو.
لای خۆیەوە مەزڵووم کۆبانی لە تویتێکدا لە تۆڕی کۆمەڵایەتیی “X” رایگەیاند: "ئەنجامدەرانی هێرشەکەی ئەنقەرە بە ناوچەکانی ئێمەدا تێنەپەڕیوە وەک بەرپرسانی تورکیا بانگەشەی بۆ دەکەن، ئێمەش لایەنێک نین لە ململانێ ناوخۆییەکانی تورکیادا و هانی جۆشدانی نادەین".
کۆبانی ئاماژەی بەوەش‌کرد، تورکیا بەدوای بیانوودا دەگەڕێت بۆ شەرعیەتدان بە هێرشە بەردەوامەکانی بۆ سەر ناوچەکانی کوردستانی سووریا، بۆ دەستپێکردنی دەستدرێژییەکی سەربازی نوێ و ئەمەش نیگەرانییە قووڵەکانمان بەرزتر دەکاتەوە.
ناوبراو ڕوونیشی‌کردەوە، بەئامانجگرتنی ژێرخان و سەرچاوە ئابوورییەکانی ناوچەکە و دانیشتووانی شارەکان تاوانی جەنگە و ناوچەکانمان پێشتر و ئێستاش بەدەست ئەو هێرشانەوە دەناڵێنن.
فەرماندەی هەسەدە لە کۆتایی تویتەکەیدا داوای لە لایەنە گەرەنتیکارەکان و کۆمەڵگەی نێودەوڵەتی کرد کە هەڵوێستی گونجاویان هەبێت سەبارەت بەم هەڕەشە دووبارەبووانە، بۆ دەستەبەرکردنی ئارامی و سەقامگیری لە ناوچەکانی باکوور و رۆژهەڵاتی سووریا.
شایانی باسە دوێنێ چوارشەممە، هاکان فیدان، وەزیری دەرەوەی تورکیا هەڕەشەی بۆردوومان‌کردنی دامەزراوە گرنگەکانی باکووری سووریای کرد.
Your Comment