«کۆفان کەنعۆ» سەرۆکی پارتی ڕۆژی دیموکراتی کوردستانی سووریا لە گفتوگۆ لەگەڵ کوردپرێسدا ئاماژەی دا بە کەمبوونەوەی ئاوی فۆرات لە سووریا ئەوەش بەبۆنەی دروست کردنی بەنداو لە تورکیا و وتی: ئەمەش پیلانێکی دیکەی تورکیایە بۆ لەناو بردنی بەڕێوەبەرایەتیی خۆسەر و دوژمنی کردن لەگەڵ کورد. تورکیا هەم لە ڕێگای سیاسی و هەم لە ڕێگای سەربازیی و ئابوورییەوە زەبری لە بوونی کورد و بەڕێوەبەرایەتیی خۆسەر داوە ئەمڕۆکەیش بە چەکی ئاو هاتۆتە پێشەوە.
ناوبراو وتیشی: تورکیا ئەگەر کۆتایی بە شەڕی سەربازیی بێنێت شەڕێکی دیکە دەست پێدەکات و ئەمڕۆش فۆرات وەکوو ئامێری خۆسەپاندن بەکار دێنێت. تورکیا پێی خۆشە کورد برسی و کۆیلە بێت.
کۆفان کەنعۆ زیاتر ڕایگەیاند: هەم بەڕێوەبەرایەتیی خۆسەر و هەم حزبە جیاجیاکان لە کوردستانی سووریا سکاڵای خۆیان گەیاندۆتە ناوەندە نێونەتەوەییەکان و ئەمریکا و ئەرورووپا بەڵام دونیا بێدەنگە هەمبەر ڕەفتارەکانی تورکیا.
سەرۆکی پارتی ڕۆژی دیموکراتی کوردستانی سووریا ئاشکراشی کرد: بەڕێوەبەریی خۆسەر تا ئێستا چەندین کۆبوونەوەی بەمەبەستی دۆزینەوەی ڕێگاچارەیێک ئەنجام داوە. لەمبارەوە حکوومەتی سووریاش بێدەنگی هەڵبژادووە هەمبەر هەڵمەت و پەلامارەکانی تورکیا.
کۆدی هەواڵنێر: 60113
Your Comment