«هەواڵ عیسا» ئەندامی لیژنەی ناوەندیی پارتی یەکێتیی کوردستانی سووریا (P.Y.K.S) لە وەڵامی پرسیارێکی کوردپرێسدا کە ئەنجامی دانوستانەکانی نێوان ئەنجومەنی نیشتمانیی کورد (ENKS) و حزبەکانی یەکێتیی نیشتمانیی کورد (PYNK) بە کوێ دەگات، ڕایگەیاند: بۆ ماوەی یەک ساڵ دەبێت کە دانوستانی کودری-کوردی لەنێوان لایەنەکاندا بە نێوەندگیریی نوێنەری ئەمریکا و ژەنراڵ کۆبانی دەستی پێکردووە بەڵام ماوەی سێ مانگە ڕاگیراوە ئەوەش بەهۆی هەڵبژاردنەکان لە ئەمریکا و گۆڕینی نوێنەری ئەمریکا لە دانوستانەکاندا.

ناوبراو درێژەی دا: پاش دەست بەکار بوونی بایدن وەکوو سەرۆکی نوێی ئەمریکا و کاتێک کە هێشتا دانوستانەکان درێژەیان هەبوو بەرپرسانی پەیەدە دەستیان کرد بە هێرش کردنەسەر پێشمەرگەی ڕۆژ و ئەنجومەنی نیشتمانیی کورد کە ئەمەش جێگای داخە.

ناوبراو درێژەی دا: بەشێک لەوان بەتایبەت پەکەکە نایەوێت دانوستانەکان ئەنجامیان ببێت و وتەی نابەرپرسیارانە لەناو کۆمەڵگادا بڵاو دەکەنەوە.

ئەندامی لیژنەی ناوەندیی پارتی یەکێتیی کوردستانی سووریا (P.Y.K.S) لەبارەی ڕای ئەنجومەنی نیشتمانیی کورد لەسەر دانوستانەکان وتی: ئەنەکەسە دانوستانی کوردی-کوردی بەستراتێژیک لەقەڵەم دەدات و بە گرنگیشەوە پێیدا دەڕوانێت.

ناوبراو جەختی کردەوە: ئەنجومەنی نیشتمانی ئەو چەشنە وتانە قبووڵ ناکات و بە لایەنی ئەمریکی و حزبەکانی نیشتمانی-ی ڕاگەیاندووە کە دەبێت پەیەدە لە گەل و لە ئەنەکەسە داوای لێبووردن بکات.

هەواڵ عیسا وەبیری هێنایەوە: ئێمە ڕوانینێکی ستراتێژیکمان بۆ دانوستانی کوردی-کوردی هەیە و مکووڕین لەسەر درێژەدان بە گفتوگۆکان، بەو مەرجەی کە ئاڵدار خەلیل سەرۆکی دانوستانی کوردی-کوردی لەکار لابدرێت یا داوای لێبووردن لە ئەنجومەنی نیشتمانیی کورد بکات.

ئەم سیاسەتوانە کوردە ڕاشیگەیاند: پەیەدە و ئەندامەکانی واز لە هەڵمەتدان لەدژی ئەنجومەنی نیشتمانی کورد ناهێنن و چەند مانگ پێش ئێستاش ئاگریان لە نووسینگەکانی ئەنەکەسە لە کوردستانی سووریا بەردا و ژمارەیێک لە ڕۆشەنبیران و ڕۆژنامەنووسانی کوردیان دەستگیر کرد و منداڵانیان ناچار بە سەربازیی زۆرەملێ کرد.

کۆدی هەواڵنێر: 60113